پی ٹی آئی کے ناسمجھ لوگوں کو سفارتی آداب کا پتہ ہی نہیں، شرجیل میمن

کراچی( بیورو رپورٹ) صوبائی وزیر اطلاعات سندھ شرجیل انعام میمن نے کہا ہے کہ پی ٹی آئی کے ناسمجھ لوگوں کو سفارتی آداب کا پتہ ہی نہیں۔شرجیل انعام میمن نے علی زیدی کی پریس کانفرنس پر ردِ عمل دیتے ہوئے کہا کہ پی ٹی آئی کے ناسمجھ لوگوں کو سفارتی آداب کا پتہ ہی نہیں، ایف اے ٹی ایف پر آفیشلی اعلان ہی نہیں ہوا، یہ لوگ صبح سے پاکستان کو گرے لسٹ سے نکالنے کا کریڈٹ لینے کی کوشش کر رہے ہیں۔انہوں نے کہا کہ ان کی انہی حماقتوں کی وجہ سے دوست ممالک پاکستان سے ناراض ہو گئے تھے، اتحادی حکومت اور وزیر خارجہ و چیئرمین بلاول بھٹو زرداری کی انتھک محنت رنگ لا رہی ہے، پاکستان کو گرے لسٹ سے خارج کرنے کے واضح امکانات ہیں۔

انہوں نے کہاکہ لیکن ہمیں سفارتی آداب کا خیال رکھنا چاہیے اور آفیشل اعلان کا انتظار کرنا چاہیے، اگر گرے لسٹ سے نکلنے کا اعلان کیا جاتا ہے تو اس کا پورا کریڈٹ چیئرمین بلاول بھٹو زرداری کو جاتا ہے، پی ٹی آئی این اے 240 سے اپنی شکست کو بھانپ کر بھاگ گئی، ان کو امیدوار ہی نہیں ملا۔شرجیل انعام میمن نے کہا کہ الزام تراشیاں، جھوٹ کو سچ میں بدلنے کے لئے بونگیاں مارنا پی ٹی آئی رہنماں کی عادت بن چکی ہے، حقیقی، جمہوری اور عوامی مارچ پاکستان پیپلز پارٹی کے سوا اور کوئی نہیں کرسکتا۔انہوں نے کہا کہ چیئرمین بلاول بھٹو زرداری کے اسلام آباد لانگ مارچ میں ہزاروں کارکنان شریک تھے، کراچی سے اسلام آباد تک چھوٹے بڑے شہروں میں چیئرمین بلاول بھٹو زرداری کا لاکھوں لوگوں نے والہانہ استقبال کیا گیا، جو سب نے دیکھا۔صوبائی وزیر اطلاعات سندھ شرجیل انعام میمن نے کہاکہ پی ٹی آئی کا لانگ مارچ جمہوری نہیں اسلام آباد پر دھاوا بولنے کا منصوبہ تھا۔ جس کو اتحادی حکومت نے ناکام بنایا۔