کراچی (نمائندہ خصوصی) گورنر سندھ کامران خان ٹیسوری کی خدمات کے اعتراف میں معروف کاروباری شخصیت اور یونٹی فوڈز کے سی ای او فرخ امین نے اپنی رہائش گاہ پر استقبالیہ کا اہتمام کیا۔ اس موقع پر معروف صنعت کار عقیل کریم ڈھیڈی، ادریس گی گی اور دیگر کاروباری شخصیات بھی موجود تھیں۔ فرخ امین سمیت تمام کاروباری شخصیات نے خصوصاً عیدالاضحی کے دنوں میں عوامی فلاح و بہبود کی کاوشوں پر گورنر سندھ کو کھڑے ہوکر خراج تحسین پیش کیا۔ انہوں نے کہا کہ گورنر سندھ کی کاوشوں سے عام آدمی کو ریلیف ملا، اور ایسے افراد بھی راشن حاصل کرپائے جو واقعی اس کے مستحق تھے اور اس سارے انتظام کو کسی بھگدڑ کے بغیر اور نظم و ضبط کے ساتھ منعقد کرنے پر بھی گورنر سندھ مبارکباد کے مستحق ہیں۔ گورنر سندھ نے تقریب میں موجود تمام کاروباری شخصیات کا شکریہ ادا کرتے ہوئے کہا کہ 12 ربیع الاول کو تعیناتی ہوئی تو اسی دن سے یہ عہد کرلیا تھا کہ عوام کی فلاح و بہبود کے لئے جو کچھ ہوسکا وہ کروں گا اور میں اللہ تعالیٰ کا ممنون و مشکور ہوں کہ اس نے مجھے عید الاضحی کے دنوں میں عوام کی خدمت کرنے کی توفیق دی اس کے علاوہ میں ان تمام حضرات کا بھی مشکور ہوں جن کے تعاون اور مدد کے باعث ایسا کرنا ممکن ہوسکا ۔
