اسلام آباد (نمائندہ خصوصی )وزیراعظم محمد شہباز شریف نے صدر آزاد کشمیر بیرسٹر سلطان محمود چوہدری، چاروں صوبوں کے گورنرز، اتحادی رہنماﺅں مولانا فضل الرحمن، بلاول بھٹوزرداری، خالد حسین مگسی، ڈاکٹر خالد مقبول صدیقی ،ایمل ولی خان اور چیئرمین جوائنٹ چیفس آف سٹاف کمیٹی جنرل ساحرشمشاد مرزا کو ٹیلیفون کیا اور ان کو عیدالاضحی کی مبارکباد دی۔ وزیراعظم آفس کے میڈیا ونگ سے جاری بیان کے مطابق وزیراعظم شہباز شریف نے آزاد ریاست جموں وکشمیر کے صدر بیرسٹر سلطان محمود کو ٹیلی فون پر عید کی مبارکباد دی۔ وزیراعظم نے صدر آزادجموں وکشمیر کے لئے خیرسگالی کے جذبات کا اظہار کیا ۔ دونوں قائدین نے مقبوضہ جموں وکشمیر میں انسانی حقوق کی خلاف ورزیوں کی مذمت کی ۔ دونوں قائدین نے غیرقانونی طورپر بھارت کے زیرقبضہ جموں وکشمیر کے عوام کے ساتھ یکجہتی کا اظہار کیا ۔دونوں قائدین نے بھارتی ریاستی دہشت گردی کا دلیری اور ثابت قدمی سے مقابلہ کرنے پر بہادر کشمیریوں کو خراج تحسین پیش کیا ۔ وزیراعظم نے صدر آزادکشمیر سے گفتگو کرتے ہوئے کہا کہ کشمیریوں کی آزادی تک پاکستان کی جانب سے ہرممکن حمایت کرتے رہیں گے ۔ وزیراعظم شہبازشریف نے پنجاب، سندھ، خیبرپختونخوا اور بلوچستان کے گورنرز کو بھی ٹیلی فون کیا اور ان کو عید کی مبارکباد دی اور نیک تمناﺅں کا اظہار کیا ۔ وزیراعظم شہبازشریف نے حکمران اتحاد میں شامل جماعتوں کے قائدین مولانا فضل الرحمن، بلاول بھٹوزرداری، خالد حسین مگسی، ڈاکٹر خالد مقبول صدیقی اور ایمل ولی خان کو ٹیلی فون کیا اور اتحادی جماعتوں کے قائدین کو عید کی مبارکباد دی اور خیریت دریافت کی ۔ وزیراعظم نے اتحادی جماعتوں کے قائدین نے ملکی مجموعی سیاسی ومعاشی صورتحال پر تبادلہ خیال کیا۔ وزیراعظم نے اتحادی جماعتوں کے قائدین کو منیجنگ ڈائریکٹر آئی ایم ایف سے ہونے والی گفتگو کے بارے میں بھی آگاہ کیا ۔ وزیراعظم شہبازشریف نے چئیرمین جوائنٹ چیفس آف سٹاف کمیٹی جنرل ساحرشمشاد مرزا کو ٹیلی فون کیا اور عید کی مبارکباد دی۔ وزیراعظم نے مسلح افواج کے پیشہ وارانہ امور اور عسکری تیاریوں سے متعلق امور پر تبادلہ خیال کیا۔
