گورنر سندھ کامران ٹیسوری کا عید پر 100 اونٹ قربان کرنے کا اعلان

کراچی(نمائندہ خصوصی) گورنر سندھ کامران ٹیسوری نے عیدالاضحی پر گورنر ہاوس میں 100 اونٹ قربان کرنے کا اعلان کیا ہے۔ایک بیان میں گورنر سندھ نے مستحق خاندانوں کو 100 بکرے اور 20 ہزار راشن کے تھیلے دینے کا بھی اعلان کیا۔انہوں نے گورنر ہاﺅس میں عیدالاضحی کے بعد انفارمیشن ٹیکنالوجی (آئی ٹی)کلاسز شروع کرنے کا بھی اعلان کیا۔کامران ٹیسوری نے کہا کہ وزیر اعظم شہباز شریف کے یوتھ پروگرام سے اسپورٹس کو فروغ ملے گا، کراچی میں چھپے ٹیلنٹ کو سامنے لانے میں یہ پروگرام اہم ہے۔انہوں نے کہاکہ ہاکی ہمارا قومی کھیل ہے لیکن کئی سالوں سے یہ کھیل بہت پیچھے چلا گیا ہے، کراچی گیمز کا انعقاد ہر سال کروانے کی کوشش کروں گا۔گورنر سندھ نے کہا کہ ہاکی لیگ میں شریک تمام کھلاڑیوں کو گورنر ہاﺅس میں عشائیہ دیا جائے گا۔