کراچی(نمائندہ خصوصی) ڈائریکٹر ٹراپیکل سائیکلون وارننگ سینٹر زبیر صدیقی نے کہاہے کہ سمندری طوفان بپرجوائے اس وقت کیٹیگری 3 کی شدت رکھتا ہے۔خصوصی گفتگو میں ڈائریکٹر ٹراپیکل سائیکلون وارننگ سینٹر زبیر صدیقی نے بتایا کہ اس شدت کے طوفان کے مرکز میں 118 سے 165 کی رفتار سے ہوائیں چلتی ہیں۔انہوں نے کہاکہ جمعرات تک اس کی شدت کم ہونے کی امید کر رہے ہیں، لینڈ فال سے قبل اس کی شدت کم ہوئی تو کیٹیگری 2 میں چلا جائے گا۔زبیر صدیقی نے بتایا کہ کیٹیگری 2 کی شدت والے سمندری طوفان کے اثرات کم ہونے میں 2 دن لگتے ہیں، بھارتی گجرات کے ساحلی علاقوں میں لینڈ فال کے وقت لہریں 30 سے 35 فٹ تک بلند ہو سکتی ہیں۔انہوں نے بتایا کہ کیٹی بندر، بدین اور اطراف کے ساحلی علاقوں میں 15 سے 18 اور 20 فٹ لہریں بلند ہو سکتی ہیں، جبکہ کراچی میں 10 سے 12 فٹ اونچی لہریں بلند ہو سکتی ہیں۔ڈائریکٹر ٹراپیکل سائیکلون وارننگ سینٹر نے کہاکہ طوفان کے باعث کراچی میں سمندر کے قریب بسے گوٹھوں کو خطرات ہیں، البتہ ڈی ایچ اے اور کلفٹن میں نقصان کا اندیشہ نہیں۔انہوں نے بتایاکہ کراچی میں بارش کا یہ سلسلہ وقفے وقفے سے جمعے اور ہفتے تک جاری رہنے کا امکان ہے۔زبیر صدیقی نے شہریوں کو ہدایت کرتے ہوئے کہا ہے کہ گھروں کی چھتوں پر لگے سولر پینل اگر مضبوط لوہے کے فریم میں نہیں تو انہیں مضبوط کیا جائے۔
