اسلام آباد (نمائندہ خصوصی ) چیئرمین سینیٹ محمد صادق سنجرانی سے دوست ملک چین کے سرمایہ کاروں کے پانچ رکنی وفد نے پارلیمنٹ ہاوس میں ملاقات کی۔ ملاقات میں دوطرفہ تعلقات سمیت باہمی دلچسپی کے امور، سرمایہ کاری اور سی پیک منصوبوں کے حوالے سے بھی تبادلہ خیال کیا گیا۔ چیئرمین سینیٹ نے کہا کہ پاکستان عالمی اور علاقائی امور میں چین کے کردار کو انتہائی اہمیت دیتا ہے۔ملاقات میں دوطرفہ تعلقات کو مزید فروغ دینے پر اتفاق کیا گیا۔ چینی وفد کی قیادت ایم سی سی ٹی کے صدر ڈونگ گاؤفینگ کر رہے تھے۔
چیئرمین سینیٹ محمد صادق سنجرانی نے کہا کہ پاکستان کی حکومت چین کے ساتھ معاشی تعلقات کو مزید وسعت دینے کی خواہاں ہے۔پاکستان اور چین کے مابین کثیرالجہتی شراکت داری پاکستان کی پالیسی کا اہم جزو ہے اور پاک- چین دوستی دونوں ممالک کے عوام کے دلوں میں بستی ہے۔
چیئرمین سینیٹ نے کہاکہ کاروباری شراکت داری اور سرمایہ کاری کے ذریعے دونوں ملکوں کے عوام کو مزید قریب لانے میں مدد ملے گی اور دونوں ملکوں کے سرمایہ کار مختلف شعبوں میں سرمایہ کاری سے استفادہ کر سکتے ہیں۔ انہوں نے کہاکہ بلوچستان قدرتی وسائل سے مالا مال ہے اور چینی سرمایہ کار مختلف سیکٹرز میں سرمایہ کاری کیلئے مواقع تلاش کریں۔ پاکستان چینی سرمایہ کاروں کو خوش آمدید کہے گا۔
چیئرمین سینیٹ نے کہا کہ صنعت کاری،کان کنی، زراعت اور ڈیجیٹل ٹیکنالوجیز میں چین کی طرف سے سرمایہ کاری کو مزید فروغ دینے کی ضرورت ہے۔چیئرمین سینیٹ محمد صادق سنجرانی نے کہا کہ سی پیک خطے کیلئے گیم چینجر ثابت ہوگا جس سے ترقی کا ایک نیا باب شروع ہوگا۔
وفد کے رہنما نے چیئرمین سینیٹ کا شکریہ ادا کرتے ہوئے کہاکہ پاکستان آکر انہیں انتہائی خوشی ہوئی ہے۔انہوں نے دو طرفہ معاونت کو فروغ دینے کی اہمیت کو اُجاگر کیا اور کہاکہ سرمایہ کاری کے ذریعے باہمی رابطہ کاری کو مزید تقویت ملے گی۔