کراچی (نمائندہ خصوصی) گورنرسندھ کامران خان ٹیسوری سے سیلانی ویلفیئر انٹر نیشنل ٹرسٹ کے سرپرست اعلیٰ مولانا بشیر فاروقی نے وفد کے ہمراہ گورنر ہاﺅس میں ملاقات کی۔ ملاقات میں مختلف شعبوں میں سیلانی کے منصوبوں ، عوامی فلاح و بہبود کے لئے مزید اقدامات ، گورنرہاﺅس میں آئی ٹی کورسز کے انعقاد اور باہمی دلچسپی کے دیگر امور پر تبادلہ خیال کیا گیا۔ گورنر سندھ نے کہا کہ مولانا بشیر فاروقی کی رہنمائی میں صوبہ کی عوام کی فلاح وبہبود کے لئے کوشاں ہوں، انہوں نے کہا کہ سیلانی کی مثالی خدمات کا ہر کوئی معترف ہے، انہوں نے مزید کہا کہ سیلانی اور دیگر فلاحی ادارے ریاست کا دست و بازو ہیں۔ کامران خان ٹیسوری نے کہا کہ آئی ٹی کورسز میں سیلانی ٹرسٹ کا تعاون خوش آئند ہے، انہوں نے کہا کہ آئی ٹی تربیت حاصل کرنے والے نوجوان ماہانہ تین سے پانچ لاکھ روپے کما سکیں گے۔ مولانا بشیر فاروقی نے کہا کہ اللہ تعالیٰ گورنرسندھ کو عوام کی مزید خدمت کرنے کی ہمت اور طاقت دے، انہوں نے مزید کہا کہ کامران خان ٹیسوری نے صحیح معنوں میں خود کو عوام کا گورنر ثابت کیا ہے۔
