کراچی ( نمائندہ خصوصی) پاکستان تحریک انصاف کی سابق رکن قومی اسمبلی صائمہ ندیم کو آف لوڈ کردیا گیا، ان کا نام اسٹاپ لسٹ میں ہونے کی وجہ سے روکا گیا۔تفصیلات کے مطابق کراچی سے پی ٹی آئی کی خاتون رہنما اور سابق ایم این اے صائمہ ندیم کو آف لوڈ کردیا گیا۔صائمہ ندیم کو آف لوڈ کرنے کے بعد ایئرپورٹ پولیس اسٹیشن پہنچادیا گیا ہے، وہ پرواز ای کے503 سے کینیڈا کے شہر ٹورنٹو جارہی تھیں۔اس حوالے سے ذرائع کا کہنا ہے کہ صائمہ ندیم کو اسٹاپ لسٹ میں نام ہونے کی وجہ سے بیرون ملک جانے سے روکا گیا۔علاوہ ازیں 9مئی کو جلاؤ گھیراؤ میں ملوث تحریک انصاف کے رہنماؤں کے گرد گھیرا مزید تنگ کردیا گیا ہے، اس حوالے سے ذرائع کا کہنا ہے کہ تحریک انصاف کے 200 سے زائد اہم رہنماؤں اور کارکنوں کے نام ملک بھر کے تمام ایگزٹ پوائنٹس پر فراہم کر دئیے گئے ہیں۔ایف آئی اے ذرائع نے بتایا ہے کہ فہرست میں شامل نام مختلف اداروں کو مقدمات میں مطلوب ہیں، ذرائع کا بتانا تھا کہ ناموں کی فہرست کراچی سمیت تمام ائرپورٹس ،سی پورٹس پر امیگریشن حکام کو فراہم کی گئی ہے، فہرست میں موجود افراد کی بیرون ملک روانگی کو ہرصورت روکنے کی ہدایت کی گئی ہے۔
