لاہور(نمائندہ خصوصی ) تحریک لبیک پاکستان (ٹی ایل پی) نے ایک بار پھر سڑکوں پر آنے کا اعلان کر دیا۔ گزشتہ روزتحریک لبیک پاکستان کے سربراہ سعد رضوی نے 22 مئی کو پاکستان بچاو مارچ کا اعلان کرتے ہوئے کہا کہ پاکستان تحریک انصاف (پی ٹی آئی)نے 9 مئی کو جو کچھ کیا اس کی مخالفت کرتے ہیں۔انہوں نے کہا کہ تحریک لبیک پہلے بھی مہنگائی کے خلاف احتجاج کر چکی ہے جبکہ ہم سیاسی اور ذاتی انتقام کے خلاف ہیں اور 9 مئی کو خواتین کے ساتھ جو سلوک کیا گیا اس کی مذمت کرتے ہیں۔سعد رضوی نے کہا کہ پاکستان کو اندرونی خطرات کا سامنا ہے اور سیاست کے لیے پاکستان کا نقصان نہ کیا جائے۔ ٹی ایل پی کو کمزور کرنے کی ہر کوشش ناکام بنائیں گے۔انہوںنے کہا کہ 9 مئی واقعہ کے ذمہ داروں کو سزا ملنی چاہیئے جبکہ ہم چاہتے ہیں الیکشن ایک ساتھ مقررہ وقت پر ہوں۔ تحریک لبیک پاکستان آئین کے ساتھ کھڑی ہے اور ہم فوجی عدالتوں کی مخالفت کرتے ہیں۔
