کراچی: تجاوزات کے خلاف آپریشن میں عملے پر فائرنگ ،مشین آپریٹر جاں بحق

کراچی(نمائندہ خصوصی)شہر قائد میں تجاوزات کے خلاف آپریشن میں عملے پر فائرنگ سے مشین آپریٹر جاں بحق ہو گیا۔تفصیلات کے مطابق سرجانی سیکٹر 8 میں تجاوزات کے خلاف آپریشن کے دوران نامعلوم افراد کی عملے پر فائرنگ سے مشین آپریٹر جاں بحق ہو گیا، صورت حال کو قابو کرنے کے لیے پولیس کی مزید نفری طلب کی گئی۔پولیس حکام کے مطابق سرجانی میں انڈسٹری کے پلاٹس پر قبضہ ختم کرانے کے لیے انکروچمنٹ ٹیم آپریشن کے لیے پہنچی تھی، آپریشن کے آغاز سے قبل بھی پولیس موقع پر موجود تھی۔پولیس حکام نے بتایا کہ لینڈ گریبرز کی جانب سے کے ڈی اے انکروچمنٹ ٹیم پر پتھراﺅ اور فائرنگ کی گئی، فائرنگ سے ایک شخص جاں بحق ہو گیا، فائرنگ کے حوالے سے مزید تفتیش کی جا رہی ہے۔ محکمہ کے ڈی اے کے مطابق فائرنگ سے جاں بحق ہونے والا شخص شاول لوڈر ہے۔سرجانی میں آپریشن کے دوران بھگدڑ مچ گئی تھی، مسلح ملزمان اور اینٹی انکروچمنٹ پولیس میں وقفے وقفے سے فائرنگ کا سلسلہ جاری رہا، پولیس کی جانب سے مشتعل افراد کو پیچھے دھکیلنے کی کوشش کی جاتی رہی۔دریں اثنا، آپریشن کے دوران انسداد تجاوزات کی ٹیم نے کئی پلاٹوں پر قائم تجاوزات کو مسمار کر دیا، پولیس نے مزاحمت کرنے والوں پر لاٹھی چارج کیا اور مظاہرین کو منتشر کر دیا۔ پولیس حکام کے مطابق صورت حال کو کنٹرول کر لیا گیا ہے، فائرنگ کرنے والوں کے خلاف کارروائی ہوگی۔