لاہور (نمائندہ خصوصی ) دمام سے لاہور آنے والا پی آئی اے کا طیارہ دوران لینڈنگ ٹائر پھٹنے سے حادثے سے بال بال بچ گیا۔نجی ٹی وی کے مطابق گزشتہ رات دمام سے لاہور آنے والی پی آئی اے کی پرواز پی کے 248 کا کمزور ٹائر لینڈنگ کے دوران پھٹ گیا جس کے باعث طیارہ خطرناک حادثے سے بال بال بچ گیا۔ٹائر لینڈنگ کے دوران رن وے سے ٹکرانے پر ٹائر مزید خراب ہوگیا۔ نجی ٹی وی کے مطابق پی آئی اے کے کپتانوں نے طیارے کو خراب ٹائر تبدیل کیے بغیر اڑانے سے انکار کردیا۔طیارے کے ٹائر تاحال تبدیل نہ ہونے کے باعث ریاض جانے والی پرواز بھی تاخیر کا شکار ہوگئی اور پرواز کے مسافروں کو ہوٹل منتقل کردیا گیا۔بتایا گیا ہے کہ طیارے کے ٹائر تبدیل کرنے کے لیے نئے ٹائر کراچی سے لاہور لائے جارہے ہیں۔
