کل جماعتی حریت کانفرنس کی طرف سے شہید محمد مقبول بٹ کو شاندار خراج عقیدت

سرینگر(مانیٹرنگ ڈیسک):بھارت کے غیر قانونی زیر قبضہ جموں و کشمیر میں کل جماعتی حریت کانفرنس کی قیادت نے معروف کشمیری رہنما محمد مقبول بٹ کو ان کے یوم شہادت پر شاندار خراج عقیدت پیش کیا ہے، جنہیں بھارتی حکومت نے 1984میں آج کے دن نئی دلی کی تہاڑ جیل میں پھانسی پر چڑھادیاتھا۔کشمیرمیڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے کہاہے کہ غیر قانونی طورپر نظربند سینئرحریت رہنماء مولوی بشیر عرفانی نے سرینگر سینٹرل جیل سے جاری ایک پیغام میں محمد مقبول بٹ کو خراج عقیدت پیش کیا ہے۔ انہوں نے مقبول بٹ کی میت کی تہاڑ جیل سے مزار شہدا رسرینگر منتقلی کیلئے قانونی کارروائی کرنے پر زوردیا۔ انہوں نے شہداء کے مشن کو ہر قیمت پر اسکے منطقی انجام تک جاری رکھنے کے عزم کا اعادہ کیا۔ حریت رہنمائوں غلام محمد خان سوپوری، بشیر اندرابی، زمرودہ حبیب، فریدہ بہن جی، یاسمین راجہ، خواجہ فردوس، امتیاز ریشی، مولانا مصعب ندوی، جموں و کشمیر ڈیموکریٹک فریڈم پارٹی، جموں و کشمیر مسلم لیگ اور تحریک حریت جموں وکشمیر نے اپنے الگ الگ بیانات میں محمد مقبول بٹ کو خراج عقیدت پیش کرتے ہوئے کہاکہ مقبول بٹ نے کشمیری نوجوانوں کو بھارتی تسلط سے آزادی کے حصول کے لیے شہادت کا راستہ دکھایا۔انہوں نے کہا کہ کشمیریوں کو اپنے عظیم قائدین پر فخر ہے جنہوں نے جدوجہد آزادی کشمیر کو اپنے خون سے پروان چڑھایا۔انہوں نے مقبول بٹ کے جسد خاکی کی تہاڑ جیل سے مزار شہدا سرینگر منتقلی کا مطالبہ کیا۔حریت رہنمائوںنے اقوام متحدہ اور انسانی حقوق کی تنظیموں پرزوردیاکہ وہ اس سلسلے میں بھارت پر دبائو بڑھائیں ۔ادھر برسلز میں کشمیرکونسل ای یوکے زیر اہتمام ایک کانفرنس کے مقررین نے شہید مقبول بٹ اور شہید افضل گورو کو شاندار خراج عقیدت پیش کرتے ہوئے کہاہے کہ شہداء کی قربانیوں کو کبھی فراموش نہیں کیا جائے گا۔انہوں نے دونوں شہداء کی جدوجہد اور قربانیاں جموں و کشمیر کی تاریخ کا ایک روشن باب ہیں، اور ان کے نظریات کشمیری قوم کے لیے مشعل راہ ہیں۔کانفرنس کے مقررین میں چیئرمین کشمیرکونسل ای یو علی رضا سید، صدر ورلڈ کشمیر ڈائسپورا الائنس یورپ چوہدری خالد جوشی، ممتاز کشمیر ی شخصیات سردار صدیق اور راجہ خالد، سردار ظہیر زاہد، شیراز بٹ، یورپی صحافی آندرے بارکس، اور برسلز پارلیمنٹ کے سابق رکن ڈاکٹر منظور ظہور شامل تھے۔ انسانی حقوق کے معروف کشمیری کارکن محمد احسن انتو نے بھی ویڈیو کانفرنسگ کے ذریعے سرینگر سے خطاب کیا۔