واشنگٹن (نیٹ نیوز) امریکہ نے کہا ہے کہ امریکا معاشی بحران پر قابو پانے کے لیے پاکستان کی کوششوں کی غیر متزلزل حمایت جاری ر رکھیں گے ۔ افغانستان کو ہمسایہ ملک کے خلاف اپنی سرزمین کا استعمال نہیں ہونے دینی چاہیے ۔ عالمی خبر رساں ادارے کے مطابق امریکی وزارت خارجہ کے ترجمان میتھیو ملر نے ہفتہ وار پریس بریفنگ کے دوران چینی وزیر اعظم کے دورہ پاکستان کے حوالے سے پوچھے گئے صحافی کے سوال کے جواب میں کہا کہ امریکا ترقی اور شرح نمو میں اضافے کا باعث بننے والی تجارت اور سرمایہ کاری کا خیرمقدم کرتا ہے۔تاہم انھوں نے یہ بھی کہا کہ امریکا ہر صورت میں پاکستان اور اس کے شراکت داروں کے باہمی فائدے کو یقینی بنانے کے لیے شفافیت اور ڈیٹا سیکیورٹی کے تحفظ کو یقینی بنانے کی ضرورت پر زور دیتا رہے گا۔میتھیو ملر نے کہا کہ پاکستان کو اپنے مفادات کے حصول کے لیے بہت محتاط رہنے کی ضرورت ہے ۔ انہوں نے اس بات کا بھی اعادہ کیا کہ امریکا، پاکستان کے ساتھ تجارتی اور سرمایہ کاری کو مزید مضبوط اور مستحکم بنائے گا۔ انہوں نے مزید کہا کہ پاکستان معاشی بحران پر قابو پانے کے لیے کوششیں کر رہا ہے، امریکا اس سلسلے میں پاکستان کی غیر متزلزل حمایت اور تعاون جاری رکھے گا۔پاکستان میں باجوڑ خود کش دھماکے میں قیمتی جانوں کے ضیاع پر میتھیو ملر نے کہا کہ اس حملے کی شدید الفاظ میں مذمت کرتے ہیں۔ امریکا نے طالبان پر بھی زور دیا ہے کہ پاکستان سمیت دیگر ممالک میں حملوں کے لیے افغان سرزمین استعمال نہ ہونے دیں۔اس موقع پر میتھیو ملر نے دہشت گرد گروہوں کے مشترکہ خطرے سے نمٹنے کے لیے پاکستان کے ساتھ مل کر کام کرنے کے عزم کا اعادہ بھی کیا۔
معاشی بحران پر قابو پانے کی کوششوں میں پاکستان کی مدد کرتے رہیں گے؛امریکہ
افغانستان کو ہمسایہ ملک کے خلاف اپنی سرزمین کا استعمال نہیں ہونے دینی چاہیے، ترجمان
