کراچی ( اسٹاف رپورٹر) معروف اداکارہ اور جانی پہچانی مصنفہ امرخان نے آنے والے رمضان کے ڈرامے میں ہیر جٹ کا کردار اد ا کیا۔یہ امرخان کیلئے بطور رائٹراورمرکزی کردار کام کرنے کا پہلا موقع ہے اور اس بناء پر ناظرین کو اس کا بے چینی سے انتظار ہے۔پاکستان کی انٹرٹینمنٹ انڈسٹری اس خبر سے بہت پرجوش ہے کہ ملک کی نامور ورسٹائل اور باصلاحیت فنکارہ آنے والے ڈرامے میں ہیر جٹ کے مرکزی کردار میں جلوہ گر ہورہی ہیں۔یہ ڈرامہ سیونتھ اسکائے کے مشہور پروڈیوسرز عبداللہ کادوانی اور اسد قریشی نے پروڈیوس کیا ہے جبکہ اس کی ہدایات صائمہ وسیم نے دی ہیں۔ توقع ہے کہ یہ ڈرامہ رمضان میں ناظرین کیلئے دلچسپی سے بھرپور ہوگا۔امرخان نے اپنے کردار ہیرجٹ کی جھلکیاں دکھاتے ہوئے بتایا کہ ان کے نزدیک یہ ایک کردار ہی نہیں ایک گہرا تاثرہے۔ہیر ایک ایسی لڑکی ہے جو اپنے حالات سے بڑھ کر بڑے بڑے خواب دیکھتی ہے۔ وہ ایک مصروف ٹک ٹاکر ہے جواپنی تسلی اور سوشل میڈیا پر متحرک رہنے کیلئے مشغول رہتی ہے اور پنجابی جٹی کی طرح بہادر ہے۔سٹوری لائن کے بارے میں ایک سوال کے جواب میں انہوں نے صرف اتنا بتایا کہ یہ سن 80 اور 90 کی دہائی کے ففٹی ففٹی، سونا چاندی اور انکل عرفی جیسے مشہور سچویشنل ڈراموں سے متاثر ہوکر لکھا گیا ہے۔اس میں رومانس، ٹکراؤ اور پیروڈیز کے ملے جلے اندازکے ساتھ پاپ کلچر کو پیش کیا گیا ہے جو ناظرین کی بڑی تعداد کیلئے دلچسپی کا باعث ہوگا۔ جنجال پورہ ایک منفرد ڈرامہ ہوگا جس میں امرخان بطور رائٹر اور اداکار دو حیثیتوں میں کام کررہی ہیں جبکہ باصلاحیت کاسٹ اورخوبصورت اسٹوری لائن بھی اس ڈرامے کی خصوصیت ہے۔ رمضان کی آمد کے ساتھ ناظرین کو ہیر جٹی کے کردار کا بھی انتظار ہے۔
