ڈاکٹر فوزیہ کی حافظ نعیم الرحمان کو جماعت اسلامی کا مرکزی امیر منتخب ہونے پر مبارکباد

کراچی (نمائندہ خصوصی ) گلوبل عافیہ موومنٹ کی چیئرپرسن اور ملک کی معروف نیوروفزیشن ڈاکٹر فوزیہ صدیقی نے حافظ نعیم الرحمان کو جماعت اسلامی کا مرکزی امیر منتخب ہونے پر مبارکباد دیتے ہوئے ان کی کامیابیوں اور استقامت کے لیے دعا کی ہے۔ عافیہ موومنٹ میڈیا سیل سے جاری کردہ بیان میں انہوں نے کہ میں امید کرتی ہوں کہ جماعت اسلامی آپ کی زیرقیادت ڈاکٹر عافیہ کی رہائی اور وطن واپسی کے لیے دینی و قومی فریضہ ادا کرے گی اور 2003 ءمیں میری ہمشیرہ اور قوم کی بیٹی ڈاکٹر عافیہ کا تین کمسن بچوں سمیت اغواءاور امریکیوں کے حوالے کرنے کے قومی سانحہ کے بعد جماعت اسلامی کے رہنماﺅں اور کارکنان نے جس طرح میرا ساتھ دیا ہے وہ سلسلہ آپ کی قیادت میں بھی جاری رہے گا۔ انہوں نے کہا کہ2024 ءڈاکٹر عافیہ کی رہائی اور وطن واپسی کے حوالے سے اہم سال ہے۔ ڈاکٹر عافیہ کیس کے وکیل کلائیو اسٹفورڈ اسمتھ کا کہنا ہے کہ میری کوشش ہے کہ اس سال کے اختتام تک ڈاکٹر عافیہ کی رہائی کو ممکن بناسکوں۔ کلائیو اسمتھ کا یہ کہنا بھی ہے کہ ڈاکٹر عافیہ کی رہائی کی چابی اسلام آباد (اقتدار کے ایوانوں) میں رکھی ہوئی ہے اوروہ عافیہ کی رہائی کے لیے پاکستانی قوم سے مدد کرنے کی اپیل بھی کرچکے ہیں۔ ڈاکٹر فوزیہ نے کہا کہ ڈ اکٹر عافیہ کی رہائی اور وطن واپسی کے مقصد کو حاصل کرنے کے لیے دینی ، سیاسی، انسانی حقوق اور سماجی بہبود کے لیے کام کرنے والی جماعتوں اور اداروں کے تعاون اور مدد کی پہلے سے زیادہ ضرورت ہے۔