اتراکھنڈ:(نمائندہ خصوصی )بھارت میں کانگریس پارٹی کی جنرل سیکریٹری پرینکا گاندھی واڈرا نے لوگوں پر زوردیا ہے کہ وہ الفاظ سے گمراہ نہ ہوں اور آئندہ لوک سبھا انتخابات میں تبدیلی کے لیے ووٹ دیں۔کشمیرمیڈیاسروس کے مطابق پرینکا گانڈھی نے اتراکھنڈ کے علاقے رام نگر میں ایک انتخابی ریلی سے خطاب کرتے ہوئے کہا کہ انتخابات کھوکھلی بیان بازی کی بنیاد پر نہیں بلکہ حقیقی مسائل پر لڑے جائیں۔انہوں نے لوگوں سے اپیل کی کہ وہ انتخابی تقریروں میں استعمال ہونے والے الفاظ سے گمراہ نہ ہوں۔ اپنا ووٹ ڈالنے سے پہلے آپ کو ایمانداری سے اپنے آپ سے سوال کرنا چاہیے کہ کیا مودی حکومت کے 10سالہ دور میں آپ کی زندگی میں واقعی کوئی مثبت تبدیلی آئی ہے؟انہوں نے کہا کہ مسلسل بڑھتی ہوئی بے روزگاری، بے قابو مہنگائی اور سوالیہ پرچہ لیک ہونے کے گھپلے لوگوں کی زندگی کی حقیقت ہیں اور بھارتیہ جنتا پارٹی کی قیادت والی حکومت ان کے لئے ذمہ دار ہے کیونکہ وہ گزشتہ 10سال سے اقتدار میں ہے۔انہوں نے کہاکہ بی جے پی حکومت اپنے کسی بھی وعدے کو پورا کرنے میں ناکام رہی۔پرینکا گاندھی نے لوگوں کو یاد دلایا کہ نوجوانوں کو دو کروڑ نوکریاں فراہم کرنے اور ہر شہری کے بینک اکانٹ میں 15لاکھ روپے جمع کرنے جیسے وعدے ادھورے ہیں۔ انہوں نے کہاکہ بی جے پی ہر الیکشن میں ووٹ کے لیے مذہب کا استعمال کرتی ہے۔کانگریس رہنما نے کہاکہ اسمبلی انتخابات سے پہلے ہماچل پردیش کو دیو بھومی بھی کہا جاتا تھا۔ کانگریس نے انتخابات میں کامیابی حاصل کی اور جب چند مہینوں کے بعد آفت آئی تو حکومت نے ریاست کے لوگوں کو راحت کے طور پر ایک پیسہ بھی نہیں دیا۔ ریاستی حکومت نے اپنے وسائل سے تمام ریلیف فراہم کیا۔
