لاڑکانہ۔:(نمائندہ خصوصی )وزیر اعلیٰ بلوچستان میر سرفراز بگٹی نےنو ڈیرو میں پاکستان پیپلز پارٹی کے چیئرمین بلاول بھٹوزرداری سے ملاقات کی،اس موق پر پی پی پی شعبہ خواتین کی مرکزی صدر فریال تالپور اور پی پی پی لاڑکانہ ڈویژن کے صدر اعجاز جاکھرانی بھی موجود تھے۔ وزیر اعلیٰ بلوچستان میر سرفراز بگٹی نے چیئرمین پاکستان پیپلز پارٹی بلاول بھٹو زرداری کو عید کی مبارک باد دی، چیئرمین پاکستان پیپلز پارٹی اور وزیر اعلیٰ بلوچستان میر سرفراز بگٹی کے مابین بلوچستان کابینہ کی تشکیل سمیت مختلف سیاسی امور پر تبادلہ خیال کیاگیا۔اس موقع پر وزیر اعلیٰ بلوچستان نے بلاول بھٹو زرداری کو بلوچستان میں بینظیر بھٹو اسکالرشپ پروگرام کے اجراءسے متعلق آگاہ کیا ،وزیر اعلیٰ بلوچستان نے صوبے میں صحت اور تعلیم کے شعبوں سمیت گڈ گورننس سے متعلق آگاہ کیا۔ اس موقع پر چیئرمین پاکستان پیپلز پارٹی اور وزیر اعلیٰ بلوچستان کے مابین صحت کے شعبے میں نمایاں بہتری کے لئے سندھ اور بلوچستان کی صوبائی حکومتوں کے اشتراک پر اتفاق کیا گیا۔بلاول بھٹو زرداری نے کہا کہ بلوچستان کی پسماندگی کے خاتمے کے لئے پہلے بھی اقدامات اٹھائے ہیں، عوامی فلاح کے اقدامات کا تسلسل جاری رکھیں گے، سندھ حکومت صحت کے شعبے میں بلوچستان کی معاونت کرے گی۔ وزیراعلیٰ بلوچستان میر سرفراز بگٹی نے کہا کہ پاکستان پیپلز پارٹی کے وژن کے مطابق غریب عوام کی بہبود کیلئے منصوبہ بندی کررہے ہیں، بلوچستان کےعوام نے پاکستان پیپلزپارٹی پر جس اعتماد کا اظہار کیا ہے، اس پر پورا اتریں گے۔انہوں نے کہا کہ صدر مملکت آصف علی زرداری اور چیئرمین بلاول بھٹو زرداری کی زیر قیادت بلوچستان کے عوام کے احساس محرومی کے خاتمے کیلئے جامع حکمت عملی مرتب کی ہے۔
