لاہور۔(مانیٹرنگ ڈیسک ):چیئرمین پی سی بی محسن نقوی نے نچلی سطح پر کرکٹ کے فروغ کے لئے پلان طلب کر لیا ہے،اس ضمن میں انہوں نے ڈائریکٹر ڈومیسٹک کرکٹ کو ٹاسک دے دیا ہے۔ چیئرمین پاکستان کرکٹ بورڈ محسن نقوی نے کہا ہے کہ سکول،کالج اور یونیورسٹی کی سطح پر ٹیلنٹ کی تلاش کیلئے جامع حکمت عملی ترتیب دی جائے۔چیئرمین پی سی بی محسن نقوی نے ہدایت کی کہ پاکستان بھر میں سکولز،کالجز اور یونیورسٹیز کے درمیان ٹورنامنٹس کے انعقاد کا پلان بنایا جائے۔انہوں نے کہا کہ کرکٹ کے ٹیلنٹ کو سامنے لانے کے لئے نچلی سطح پر ٹورنامنٹ کا انعقاد ضروری ہے۔چیئرمین پی سی بی محس نقوی نے ابھرتے ہوئے نئے پلیئرز کی پروفائلنگ کی ہدایت بھی کی ۔انہوں نے مزید کہا کہ ملک بھر میں کالجز اور یونیورسٹیز کی سطح پر خواتین کے ٹورنامنٹس بھی کروائے جائیں،خواتین کو بھی کرکٹ کے یکساں مواقع فراہم کئے جائیں گے،پاکستان میں کرکٹ کا بے پناہ ٹیلنٹ موجود ہے،اس ٹیلنٹ کو سامنے لانا ہے اور نکھارنا بھی ہے۔
