: اسلام آباد (نمائندہ خصوصی)اسلام آباد میں مسلم لیگ (ن) کے احسن اقبال، پیپلز پارٹی کے نوید قمر، استحکام پاکستان پارٹی کے صدر عبدالعلیم خان، بی اے پی کے خالد مگسی نے میڈیا سے بات چیت کی۔احسن اقبال نے کہا کہ وزیراعظم کے لیے شہباز شریف اور صدر مملکت کےلیے آصف زرداری کے نام پر اتفاق کیا گیا ہے۔انہوں نے کہا کہ چیئرمین اور ڈپٹی چیئرمین سینیٹ کا چناؤ بھی اتفاق رائے سے کیا جائے گا، نامزد وزیراعظم شہباز شریف نے اتحادیوں کو عشائیہ دیا ہے۔ن لیگی رہنما نے مزید کہا کہ عوام کی توقعات کے مطابق پاکستان کو درپیش چیلنجز سے نمٹا جائے گا، معیشت کو اپنے پاؤں پر کھڑا کیا جائے گا۔اُن کا کہنا تھا کہ نوجوانوں کے بہتر مستقبل کےلیے کام کیا جائے گا، ملک میں اندرونی یکجہتی پر کام کیا جائے گا، تمام اتحادی مل کر کام کریں گے، اقتصادی و سماجی چیلنجز پر پورا اترا جائے گا۔نوید قمر نے کہا کہ ہم تمام اتحادی مل کر ووٹ دیں گے، ہم سب مل کر چلیں گے، بلاول بھٹو نے زور دیا ہے کہ قومی مفاہمت سے کام کریں۔انہوں نے کہا کہ سب کو آن بورڈ لے کر میثاق معیشت اور میثاق مفاہمت کرنا ہے۔عبدالعلیم خان نے مزید کہا کہ تمام اتحادی جماعتوں نے مل کر امیدواروں کی حمایت کا فیصلہ کیا ہے، انتخابات کا عمل گزر چکا، اب سب بڑی جماعتیں حکومت کا حصہ ہیں۔ان کا کہنا تھا کہ خدارا اب عوام پر رحم کریں اور ان کے مسائل حل کریں، انتخابات کے بعد کے مراحل خوش اسلوبی سے طے کریں۔عبدالعلیم خان نے کہا کہ عوام کو ریلیف دیا جائے، استحکام پاکستان پارٹی اتحادیوں کے ساتھ ہے۔خالد مگسی نے کہا کہ تمام اتحادی ساتھ ہیں، ہم عوام کے مسائل مل کر حل کریں گے، عوام کی مشکلات کا حل ہمارا ٹاپ ایجنڈا ہوگا۔
حکمران اتحاد کاوزیراعظم کےلیے شہباز شریف اور صدر مملکت کےلیے آصف علی زرداری کے نام پر اتفاق
