گوجرانوالہ (سٹاف رپورٹر)مسلم لیگ ن کے ممبر صوبائی اسمبلی نواز چوہان نے کہا ہے کہ میاں نواز شریف کی قیادت میں حکومت ملک کو حقیقی ترقی کی راہ پر گامزن کرے گی، مہنگائی کم ہو گی اور عوام کو ریلیف ملے گا، ملک و قوم کو درپیش مسائل کے منجدھار سے نکالنے کے لئے عملی کاوشوں کا وقت ہے، ایک دوسرے پر کیچڑ اچھالنے اور گریبان پکڑنے کی بجائے مل جل کر ملک کو بحرانوں سے بچانے کے لئے تمام جماعتوں کو آگے آنا چاہئے، عوام نے مسلم لیگ ن کو مینڈیٹ دیا جس کا احترام کرنا ہوگا۔ ان خیالات کا اظہار انہوں نے اپنے ڈیرہ گلہ ٹاور والا کھیالی میں حلقہ کے مختلف علاقوں سے ملاقات کے لئے آئے معززین علاقہ سے گفتگو کرتے ہوئے کیا۔ ان کا کہنا تھا کہ آج ملک میں جو خرابیاں ہیں وہ تحریک انصاف کی غلط پالیسیوں کا نتیجہ ہے، باشعور قوم نے الیکشن میں نیازی ٹولے کے بیانیہ کو مسترد کر دیا۔ انہوں نے مزید کہا کہ حلقہ پی پی 62 کے عوام کا شکرگزار ہوں جنہوں نے مجھے اپنی خدمت کے لئے ایک بار پھر منتخب کیا ، انشاء اللہ ماضی کی طرح مستقبل میں بھی ان کی تمام امیدوں پر پورا اتروں گا۔ اس موقع پر مٹھائی بھی تقسیم کی گئی۔
