لاہور:صدرمسلم لیگ شہباز شریف کی وفد کے ہمراہ لاہور میں آصف علی زرداری اور بلاول بھٹو زرداری سے ملاقات

لاہور(بیورو رپورٹ) پاکستان مسلم لیگ (ن) کے صدر شہباز شریف نے وفد کے ہمراہ لاہور میں آصف علی زرداری اور بلاول بھٹو زرداری سے ملاقات کی۔ دونوں جماعتوں نے سیاسی تعاون جاری رکھنے پر اصولی اتفاق کیا کہ عوام کی اکثریت نے ہمیں مینڈیٹ دیا ہے، ہم عوام کو مایوس نہیں کریں گے۔مسلم لیگ ن کے صدر شہباز شریف نے پارٹی رہنماؤں کے ایک وفد کے ہمراہ بلاول ہاؤس لاہور میں آصف علی زرداری اور بلاول بھٹو زرداری سے ملاقات کی۔اس ملاقات کے حوالے سے مشترکہ اعلامیہ میں کہا گیا کہ مسلم لیگ ن اور پیپلز پارٹی میں سیاسی تعاون پر اصولی اتفاق ہوگیا ہے۔دونوں جماعتوں کے قائدین کا کہنا تھا کہ عوام کی اکثریت نے ہمیں مینڈیٹ دیا ہے، ہم عوام کو مایوس نہیں کریں گے۔قائدین نے ملک کو سیاسی استحکام سے ہم کنار کرنے کےلیے سیاسی تعاون جاری رکھنے پر اتفاق کیا۔مشترکہ اعلامیہ کے مطابق دونوں جماعتوں کے قائدین نے اتفاق کیا کہ مل کر سیاسی عدم استحکام سے ملک کو بچائیں گے۔ملاقات میں دونوں جماعتوں نے حکومت سازی کے حوالے سے مختلف تجاویز پر بھی تبادلہ خیال کیا۔ پیپلز پارٹی کی قیادت کا کہنا تھا کہ مسلم لیگ ن کی تجاویز کو سینٹرل ایگزیکٹو کمیٹی کے اجلاس میں رکھیں گے۔ مسلم لیگ (ن) کے وفد میں اعظم نذیر تارڑ، ایاز صادق، احسن اقبال، رانا تنویر، خواجہ سعد رفیق، ملک احمد خان، مریم اورنگزیب اور شزا فاطمہ شامل تھے۔