سندھ کی انتظامی کارکردگی پنجاب سے بہتر ہے،افسوس ن لیگ وزرائے اعظم کے امیدواران کے درمیان مناظرے کیلئے تیار نہیں، بلاول بھٹو

کراچی ( نمائندہ خصوصی)پاکستان پیپلز پارٹی (پی پی پی) کے چیئرمین بلاول بھٹو زرداری کا کہنا ہے کہ یہ حقیقی معنوں میں افسوسناک ہے کہ مسلم لیگ ن وزرائے اعظم کے امیدواران کے درمیان مناظرے کیلئے تیار نہیں ہوئی سماجی رابطے کی ویب سائٹ ایکس پر دیے گئے اپنے بیان میں بلاول بھٹو نے کہا کہ مسلم لیگ ن کی وجہ سے ایک افسانوی بات کہ پنجاب انتظامی کارکردگی میں دیگر صوبوں سے بہتر ہے کی اصلاح ضروری ہے۔
بلاول بھٹو زرداری نے کہا کہ حفیظ پاشا کی کتاب ’پاکستان میں انسانی تحفظ‘ میں لکھا ہے کہ سندھ کی انتظامی کارکردگی پنجاب سے بہتر ہے، سندھ نہ صرف حکومت میں بلکہ کسی بھی انتخاب کی آزادی میں پنجاب سے بہتر ہے۔چیئرمین پیپلز پارٹی نے کہا کہ اس کتاب میں یہ لکھا ہے کہ سندھ کے لوگ پنجاب کے مقابلے میں کسی بھی قسم کے خوف اور ڈر سے بھی آزاد ہیں، اہلیان سندھ پنجاب کے مقابلے میں آمدنی میں اضافے اور انسانی تحفظ میں آگے ہے۔بلاول بھٹو زرداری نے مزید کہا کہ مسلم لیگ ن سندھ سے متعلق بہتر کارکردگی کے حقائق سے آگاہ ہے اور اسی لیے وہ مباحثے سے راہ فرار اختیار کر رہے ہیں۔