کراچی( بیورو رپورٹ)سابق وفاقی وزیر و صدر پی ٹی آئی سندھ علی زیدی نے کہا ہے کہ سندھ پولیس حملہ آوروں کی حفاظت کر رہی ہے، سندھ میں الیکشن مہم کے دوران ریاستی دہشتگردی دیکھی گئی۔ بلدیاتی انتخابات کے پہلے مرحلے سے متعلق وڈیو بیان جاری کرتے ہوئے سابق وفاقی وزیر و صدر پی ٹی آئی سندھ علی زیدی نے کہا کہ آج سکھر، لاڑکانہ، نوابشاھ اور میرپور خاص میں پولنگ ہونے جارہی ہے میں الیکشن کمیشن سے کچھ سوالات پوچھنا چاہتا ہوں، بلاول اور مراد علی شاہ نے لاڑکانہ میں جلسہ کیا اور انتخابی مہم کے دوران وفاقی وزیر اور وزیر اعلی کا جلسہ قوانین کی کھلی خلاف ورزی تھی۔انہوں نے کہا کہ کیا الیکشن کمیشن نے انہیں نوٹسز جاری کیے؟ ہم ڈیڑھ ماہ سے الیکشن میں ہونے والی زیادتیوں پر بیانات دیتے رہے۔انہوں نے کہا الیکشن مہم میں سرکاری مشینری کا بے دریغ استعمال کیا گیا جبکہ سندھ میں الیکشن مہم کے دوران ریاستی دہشتگردی دیکھی گئی۔انہوں نے کہا کہ زرداری مافیا نے ہمارے خلاف پولیس کو استعمال کیا، ہمارے امیدواروں کو اغوا کیا گیا اور انہیں ڈرا دھمکا کر دستبردار ہونے کو کہا گیا۔ علی زیدی نے کہاکہ امیدواروں کو تجویز و تائید کنندہ کو بھی تشدد کا نشانہ بنایا گیا، زرداری مافیا کے خلاف امیدواروں پہ گولیاں بھی چلی۔سابق وفاقی وزیر نے کہا کہ ہمارے کئی امیدواروں کو عدالت سے رجوع کرنا پڑا، کیا ریاستی مشینری کا کھلا استعمال الیکشن کمیشن کو نظر نہیں آیا؟علی زیدی نے کہا کہ ہمارے امیدواروں نے زبردست حوصلے کا مظاہرہ کیا، ظلم کے سامنے کھڑے رہنا جہاد ہوتا ہے۔