الیکشن آیا ہے تو یہ لوگ وقتی مینڈک کی طرح نکل آئے ہیں‘ احسن اقبال

نارووال (نمائندہ خصوصی) مسلم لیگ ن کے رہنما و سابق وفاقی وزیر احسن اقبال نے کہا کہ الیکشن آیا ہے تو یہ لوگ وقتی مینڈک کی طرح نکل آئے ہیں، الیکشن ہار گئے تو یہ لوگ 5 سال نظر نہیں آئیں گے۔نارووال میں الیکشن ہال کے افتتاح پر ورکرز سے خطاب کرتے ہوئے احسن اقبال نے کہا کہ 2018ءتک کا سفر کامیابی سے مکمل کیا، پانچ سالوں میں 4 سال تبدیلی کی نظر ہو گئے، وہ ترقی کا سفر جو پاکستان نے 2013ءمیں نوازشریف کی قیادت میں شروع کیا تھا 2018ءمیں چند لوگوں کی سازش کے ساتھ ہمارے سروں پر مسلط کر دیا گیا۔2018ءکے جلسوں میں کہا تھا اناڑی کو موٹر سائیکل کی چابی دیں گے تو اپنا سر بھی پھاڑے گا موٹر سائیکل بھی توڑ دے گا، کسی چیئرمین یونین کونسل کو وزیراعظم بنا دیا جاتا تو بانی پی ٹی آئی سے بہتر ملک چلا کر دکھاتا۔احسن اقبال نے مزید کہا کہ ایک بندہ جس نے کبھی یونین کونسل بھی نہیں چلائی تھی اور اپنا گھر بھی نہ چلا سکا اس کے ہاتھ میں ایٹمی قوت کی کنجیاں پکڑا دی گئیں، اس نے پاکستان کی اینٹ سے اینٹ بجا دی، میری سیاست کے تین اصول ہیں امن، تعلیم اور ترقی۔