امن و امان کی صورتحال کے باعث انتخابات میں تاخیر نہیں ہوگی، فواد حسن فواد

اسلام آباد (نمائندہ خصوصی) نگران وفاقی وزیر فواد حسن فواد نے کہا ہے کہ امن و امان کی صورتحال کے باعث انتخابات میں تاخیر نہیں ہوگی۔امریکی میڈیا کو انٹرویو دیتے ہوئے فواد حسن فواد نے کہا کہ انتخابات کے ملتوی ہونے کی قیاس آرائیاں درست نہیں، کوئی ایسا ابہام نہیں کہ انتخابات 8 فروری کو نہیں ہوں گے۔فواد حسن فواد نے کہا کہ آئین و قانون کو دیکھتے ہوئے انتخابات میں تاخیر کی گنجائش نہیں، مولانا فضل الرحمٰن اپنے خدشات پر سپریم کورٹ یا الیکشن کمیشن جاسکتے ہیں۔انہوں نے کہا کہ لاڈلے اور لیول پلیئنگ فیلڈ کے بیانات سیاسی بیانیہ ہے، نگراں حکومت غیر جانبداری سے امور انجام دے رہی ہے، سیاسی جماعتیں الزامات کے بجائے انتخابی منشور پر توجہ دیں۔انہوں نے مزید کہا کہ نواز شریف کے لاڈلے ہونے کے بیانات سیاسی بیانیہ ہے، نواز شریف کے ساتھ سرکاری حیثیت میں کام کرنے سے وابستگی رہی ہے، ان کے سیاسی ایجنڈے سے اتفاق نہیں کرتا۔نگراں وزیر نے کہا کہ افغان شہریوں کی واپسی پر نظرِثانی نہیں کی جارہی، پوری کوشش ہے پی آئی اے کی نجکاری کر کے جائیں۔