جنگل کا بھی کوئی قانون ہوتا ہے، کراچی میں قانون صرف پیسہ ہے، خالد مقبول

کراچی (نمائندہ خصوصی) متحدہ قومی موومنٹ پاکستان کے کنوینر ڈاکٹر خالد مقبول صدیقی نے کہا ہے کہ کراچی میں انتہا کے پیمانے اپنی حد کو پہنچ چکے ہیں، یہاں قانون صرف پیسہ بن گیا ہے۔ میڈیا سے گفتگو کرتے ہوئے خالد مقبول صدیقی نے کہا کہ بلڈنگ کوڈز اور قوانین پر عمل درآمد کی ضرورت ہے، جنگل کا بھی کوئی قانون ہوتا ہے یہاں قانون صرف پیسہ بن گیا ہے۔ انہوں نے کہا کہ اس شہر میں کئی جوانوں کو ماورائے عدالت قتل ہوتے دیکھا ہے، اس شہر پر اہلکار نہیں قابضین 15 سال سے قابض ہیں، ایسا نہ ہو کہ یہ شہر مجبور ہو کر آئین اور قانون اپنی مرضی سے چلانے کی کوشش کرے۔ انہوں نے کہا ہے کہ کراچی کے شہری کس کا گریبان پکڑیں یہ پتہ چلنا چاہیے۔ کراچی کو جواب چاہیے کہ کون سا در ہے جہاں جا کر انصاف کی بھیک مانگیں۔ایم کیو ایم کے رہنما نے کہا کہ وزیرِ اعلیٰ سندھ آئیں اور بتائیں کہ انصاف کیسے دلائیں گے، ان کے پاس کتنے اختیارات ہیں۔