اسلام آباد (نمائندہ خصوصی) جمعیت علمائے اسلام ف کے سربراہ مولانا فضل الرحمن سے برطانوی ہائی کمشنر نے ملاقات کی جس میں دو طرفہ تعلقات پر بات چیت کی گئی۔برطانوی ہائی کمشنر جین میریٹ، پولیٹیکل سیکرٹری سیم فلیچر کی جے یو آئی سربراہ مولانا فضل الرحمان کی رہائش گاہ پہنچیں۔ مولانا فضل الرحمن اور جین میریٹ کی ملاقات میں باہمی دلچسپی کے امور پر بات چیت کی گئی۔اس موقع پر جماعت کے دیگر سینئر رہنما بھی موجود تھے۔ذرائع کے مطابق برطانوی ہائی کمشنر جین میریٹ نے مو لانا فضل الرحمن سے افغانستان میں خواتین کی تعلیم کے حوالے تعاون کی اپیل کی۔مولانا فضل الرحمان کا عالمی برادری کو افغانستان کے ساتھ تعلقات بہتر بنانے اور معاملات باہمی افہام و تفہیم سے حل کرنے کا مشورہ دیتے ہوئے کہا کہ مغرب اور اسلام کے درمیان ثقافتی تقسیم کو تسلیم کیا جائے،خواتین کی تعلیم کے حامی ہیں لیکن افغانستان کے اسلامی اور پشتون پس منظر کو سامنے رکھتے ہوئے وہاں کی حکومت خواتین کی تعلیم کے لئے ماحول بنا رہے ہیں،افغانستان میں امن وامان کے قیام میں بتدریج بہتری آرہی ہے ،امن وامان کے قیام کے ساتھ ساتھ یہ مسائل بھی حل ہونگے ،مولانا کا مزید کہنا تھا کہ افغانستان میں خواتین اور بچوں کی تعلیم پر پریشان ہونے والوں کو غزہ کی خواتین اور بچوں کی طرف توجہ دینی چاہیے جہاں انسانی حقوق پامال ہورہے ہیں،غزہ میں چار ہزار خواتین ،چھ ہزار بچے اور بیس ہزار عام شہریوں کو بموں کے ذریعے شہید کیا گیا۔
مولانا فضل الرحمن سے برطانوی ہائی کمشنر کی ملاقات،دو طرفہ تعلقات پر بات چیت
غزہ کی خواتین اور بچوں کی طرف بھی توجہ دینی چاہیے 6 ہزار بچوں کو شہید کر دیا گیا ، فضل الرحمن
