استنبول (مانیٹرنگ ڈیسک) امیر جماعت اسلامی سراج الحق نے کہا کہ مسلمان حکمران پونے دو ارب عوام کی حقیقی نمائندگی کا حق ادا کریں۔ امیر جماعت اسلامی سراج الحق نے استنبول میں الاتحاد العالمی العلماءالمسلمین کے اجلاس سے خطاب کرتے ہوئے کہا کہ غزہ میں فلسطینیوں کی نسل کشی کو 35 روز گزر گئے، بچوں اور خواتین کو بے دریغ قتل کیا جا رہا ہے، ہسپتال، سکول محفوظ نہیں، اسرائیلی سفاکیت روکنے کے لئے عملی اقدامات کئے جائیں۔ سراج الحق نے کہا کہ او آئی سی ایسے اعلانات کرے جس سے امت مسلمہ کی حوصلہ افزائی ہو، اسلامی سربراہی کانفرنس میں حماس قیادت کو اپنا موقف پیش کرنے کا موقع دیا جائے، رفح کراسنگ کھول کر وہاں فی الفور ایمرجنسی بنیادوں پر ہسپتال تعمیر کیا جائے۔ امیر جماعت اسلامی نے کہا کہ فلسطینیوں کی سکیورٹی کا بندوبست کرنا اسلامی ممالک کی ذمہ داری ہے، مسجد اقصیٰ کی حفاظت کے لئے امت ایک ہو جائے۔
مسلمان حکمران پونے دو ارب عوام کی حقیقی نمائندگی کا حق ادا کریں‘ سراج الحق
غزہ میں فلسطینیوں کی نسل کشی کو 35 روز گزر گئے، بچوں اور خواتین کو بے دریغ قتل کیا جا رہا ہے‘ اجلاس سے خطاب
