نیویارک(نمائندہ خصوصی)نیویارک میں مقیم ”مڈل ایسٹ آئی“ کے سینئر رپورٹر آزاد عیسیٰ نے کہا ہے کہ بھارت اور اسرائیل شراکت داروں اور اتحادیوں کے طور پر تیزی سے ایک دوسرے کے قریب آچکے ہیں اور وہ مقبوضہ علاقوں کشمیر اور فلسطین میں ایک جیسے حربے استعمال کر رہے ہیں۔آزاد عیسیٰ نے ایک ویڈیو پیغام میں کہا کہ جموں کشمیر کا تنازعہ 1947ء جبکہ فلسطین کا 1948ء سے چلا آرہا ہے۔انہوں نے کہا کہ اسرائیل اور بھارت دونوں فلسطین اور جموں کشمیر میں نسلی تطہیر کر رہے ہیں۔ 
آزاد عیسیٰ نے کہا کہ بھارت اور اسرائیل 1947ء اور 1948ء سے کشمیر اور فلسطین میں آبادکاری کے نوآبادیاتی منصوبوں میں مصروف ہیں ، بھارت کا ہندوتوا اور اسرائیل کی صیہونیت کشمیریوں اور فلسطینیوں کے وجود کیلئے مسلسل خطرہ ہے۔ اُنہوں نے کہا کہ بھارتی اور اسرائیلی فوجیں کشمیریوں اور فلسطینیوں کو نیست و نابود کرنے کے لیے ایک جیسے حربے استعمال کر رہی ہیں۔امریکی صحافی نے مزید کہا کہ یہ دونوں ملک اپنے آپ کو جمہوری گردانتے ہیں لیکن حقیقت یہ ہے کہ کشمیر اور فلسطین میں دونوں میں میڈیا والوں کو نشانہ بنا رہے ہیں ، دونوں زمینوں پر قبضے ، لوگوں کو بے گھر کرنے ، اختلاف رائے کو دبانے اور صحافیوں کی آواز کو خاموش کرنے کیلئے ایک جیسے حربے اپناتے ہیں۔
