اسلام آباد (نمائندہ خصوصی) افغانستان کیلئے 34 ہزار ٹن کھاد سے لدا جہاز گوادر پہنچ گیا۔ تفصیلات کے مطابق گوادر ٹرانس شپمنٹ کو مزید فروغ دینے کیلئے 34ہزار ٹن کھاد سے لدا جہاز گوادر پورٹ پہنچ گیا ہے جسے پاک افغان ٹرانزٹ ٹریڈ معاہدے کے تحت افغانستان بھیجا جائے گا۔ گوادر پرو کے مطابق یہ کھاد گوادر فری زون کے علاقے میں رجسٹرڈ دو نجی اداروں ایگوین پرائیویٹ لمیٹڈ اور کے بی فرٹیلائزر کے مشترکہ منصوبے کے ذریعے درآمد کی گئی ہے۔رپورٹ کے مطابق کھاد اتارنے کے بعد اسے دونوں اداروں کی جانب سے گوادر فری زون میں مشترکہ طور پر لئے گئے گودام میں پیک کیا جائیگا جس کے بعد یہ ٹرکوں کے ذریعے افغانستان پہنچائی جائیگی۔ماہر اقتصادیات شاہد حسین کے مطابق اگر چین، افغانستان و دیگر وسطی ایشیائی معیشتیں زمینی راستوں کے ذریعے گوادر سے منسلک ہوں تو پاکستان ٹرانس شپمنٹ حقیقی صلاحیت تک پہنچ سکتا ہے۔
