ممبئی(نیٹ نیوز: مانٹرنگ ڈیسک)بھارتی ریاست مہاراشٹرا میں سوشل میڈیا پر متنازع پوسٹ کرنے پر 2 گروہوں کے درمیان ہونے والے جھگڑے میں ایک شخص ہلاک اور 8 زخمی ہوگئے۔بھارتی میڈیا کے مطابق یہ واقعہ ریاست مہاراشٹرا کے گاؤں پیسوالی میں پیش آیا جہاں دو گروہوں میں جھگڑا اس قدر بڑھ گیا کہ ایک شخص کی جان چلی گئی۔میڈیا رپورٹس کے مطابق پولیس کا کہنا ہےکہ اتوار کے روز سوشل میڈیا پر ایک متنازع پوسٹ کی گئی، جس شخص نے یہ پوسٹ کی وہ ذہنی امراض کا شکار ہے، اس نے اپنی پوسٹ میں دوسری ذات کے لوگوں کو نشانہ بنایا تھا پولیس کے مطابق متنازع پوسٹ پر کچھ نوجوانوں سے پوچھ گچھ جاری تھی کہ پولیس چوکی کے باہر متاثرہ ذات کے لوگوں نے ہنگامہ کردیا۔پولیس کے مطابق ہنگامہ اس حد تک بڑھ گیا کہ دونوں گروہوں نے ایک دوسرے پر پتھراؤ کیا اور جلاؤ گھیراؤ شروع کردیا،اس دوران مشتعل افراد نے سڑکوں پر آگ لگانے کے ساتھ کچھ گھروں کو بھی جلادیا جس کے نتیجے میں ایک شخص ہلاک اور 8 افراد زخمی ہوگئے۔بھارتی میڈیا رپورٹس کے مطابق پولیس کا بتانا ہےکہ ہنگامہ آرائی سے نمٹنے کیلئے گاؤں میں انٹرنیٹ سروس کو بھی معطل کرنا پڑا جب کہ ہنگامی آرائی میں ملوث 23 افراد کو گرفتار کرلیا گیا ہے
