موبائل فون مینوفیکچرنگ انڈسٹری کے فروغ کےلئے اقدامات کر رہے ہیں، عمر سیف

اسلام آباد (نمائندہ خصوصی)نگراں وفاقی وزیر آئی ٹی عمر سیف نے کہا ہے کہ موبائل فون مینوفیکچرنگ انڈسٹری کے فروغ کے لئے اقدامات کر رہے ہیں۔تفصیلات کے مطابق یو ایس ایڈ و سیلیکون ویلی کے اشتراک سے منعقدہ سرمایہ کاری کانفرنس سے خطاب میں عمر سیف نے کہا کہ موبائل فون مینوفیکچرنگ انڈسٹری کے فروغ کے لئے اقدامات کا آغاز کر رہے ہیں، ڈیجیٹلائزیشن اور مزید 2لاکھ آئی ٹی پروفیشنلز کی تربیت کے لئے اقدامات شروع کر دیئے ہیں۔انہوں نے کہا کہ آئی ٹی انڈسٹری کو زیادہ سے زیادہ مراعات و سہولتوں کی فراہمی کا پیکیج تیار کیا ہے، آئی سی ٹی سیکٹر میں امریکا سمیت عالمی سرمایہ کاری کے لئے راہ ہموار ہے۔انہوں نے کہا کہ ملک میں مواقع،نوجوانوں میں صلاحیتیں موجود ہیں، ملک میں آئی ٹی کے شعبے میں سرمایہ کاری کی جاسکتی ہے۔انہوں نے کہا کہ سرمایہ کاری کے لئے دوستانہ ماحول فراہم کر رہے ہیں، فری لانسنگ کے فروغ کے لئے فری لانسرز کے ساتھ بھی کام جاری ہے۔