راولپنڈی ( بیورو رپورٹ)
پی ٹی آئی لیبر ونگ کی تقریب: عمران خان سے سخت سوال پوچھنے پر پارٹی کارکن چوہدری ناصف محمود گورو گجر پر لاتوں، گھونسوں سے تشدد کی ویڈیو سامنے آگئی تفصیلات کے مطابق پاکستان تحریک انصاف لیبر ونگ راول پنڈی کی تقریب میں پارٹی کارکن کو چیئرمین پی ٹی آئی عمران خان سے سوال پوچھنا مہنگا پڑ گیا۔
تحریک انصاف ڈسٹرکٹ ایگزیکٹو کونسل راول پنڈی کی خیبر پختونخوا ہاؤس اسلام آباد میں تقریب میں پارٹی کارکن چوہدری ناصف محمود گورو نے چیئرمین تحریک انصاف عمران خان سے سخت سوال کر دیا۔پارٹی کارکن نے سوال کیا کہ نظریاتی رہنما پارٹی سے باہر اور چاپلوس آپ کے دائیں بائیں ہیں۔ اس ساری صورتحال میں پارٹی کیسے چلے گی؟تاہم سوال پوچھنے والے ناصف محمود گورو کو شرکا نے گھیر کر خاموش کروانے کی کوشش کی تو عمران خان نے کارکنوں سے کہا سوال کرنے والے کارکن کو بولنے دیں۔عمران خان نے کارکن سے استفسار کیا یعنی جینوئن ورکرز باہر بیٹھے ہیں، کارکنوں کے شور شرابے کے دوران کارکن ناصف محمود گورو کو تقریب سے باہر لے جایا گیا اور لاتوں، گھونسوں سے تشدد کا نشانہ بھی بنایا گیا۔عمران خان سے سوال کرنے والے پارٹی کارکن ناصف محمود گورو کا تعلق شیخ رشید کے حلقے سے ہے۔
عمران خان سے سوال کرنے والے پارٹی کارکن ناصف محمود گورو کو پی ٹی آئی راول پنڈی کی مقامی قیادت نے رات گئے شو کاز نوٹس بھی جاری کر دیا جس میں کہا گیا کہ ڈسٹرکٹ ایگزیکٹو کونسل کی تقریب میں آپ نے بد تمیزی کی اور بہتان تراشی کی، آپ کا یہ اقدام پارٹی ڈسپلن کی سنگین خلاف ورزی ہے، تین روز میں شو کاز کا نوٹس کا جواب دیں۔