گھریلو ملازمہ پر مبینہ تشدد واقعہ،انفیکشن کی وجہ سے لڑکی کا بلڈ پریشر گرتا جارہا ہے، شدید تشدد کے باعث لڑکی کا ذہنی توازن نارمل نہیں ہے میڈیکل رپورٹ میں ہولناک انکشاف

لاہور( نمائندہ خصوصی) اسلام آباد میں سول جج کی اہلیہ کے مبینہ تشدد کا شکار ہونے والی گھریلو ملازمہ کی میڈیکل رپورٹ جنرل اسپتال نے پنجاب حکومت کو جمع کرادی ہے۔تفصیلات کے مطابق اسلام آباد میں تعینات سول جج کے گھر میں کام کرنے والی 14 سالہ گھریلو ملازمہ مبینہ تشدد سے شدید زخمی ہو گئی جس کی میڈیکل رپورٹ پنجاب حکومت کو جمع کرادی گئی ہے۔جنرل اسپتال لاہور کے 12 رکنی میڈیکل بورڈ نے پنجاب حکومت کو رپورٹ پیش کیا، رپورٹ کے مطابق تشدد کے باعث بچی کے جسم میں خون کی گردش نہیں ہو رہی اور متاثرہ لڑکی کا جگر بھی شدید متاثر ہوا ہے۔
میڈیکل رپورٹ میں کہا گیا کہ انفیکشن کی وجہ سے لڑکی کا بلڈ پریشر گرتا جارہا ہے، شدید تشدد کے باعث لڑکی کا ذہنی توازن نارمل نہیں ہے، ڈر خوف، شدید زخموں کے باعث لڑکی بات کرنے سے قاصر ہے۔میڈیکل رپورٹ کے مطابق تشدد اور شدید انفیکشن کی وجہ سے لڑکی کو جسم پر شدید سوجن ہے حالت خراب ہونے کی وجہ سے وہ کچھ کھا پی نہیں سکتی۔رپورٹ میں بتایا گیا کہ لڑکی کے خون میں ریڈ، وائٹ بلڈ سیلز، پلیٹ لیٹس انتہائی کم ہیں، انفیکشن اور زخموں کے باعث لڑکی کا شوگر بہت کم ہوگیا، لڑکی کے دونوں بازو فریکچر ہیں، تشدد سے آنکھیں بھی متاثر ہوئیں ہیں۔ڈاکٹرز کا کہنا ہے کہ لڑکی کو حالت بہتر ہونے تک آئی سی یو میں رکھا جائے گا تاکہ متاثرہ لڑکی کا بلڈ پریشر بحال ہوسکے۔