پاک بحریہ کے لئے بڑا دن : پی این ایس شاہجہاں اور پی این ایس ٹیپو سلطان بیڑے میں شامل

اسلام آباد(نمائندہ خصوصی) چین کے تعاون سےتیارکردہ مزید دو جنگی بحری جہازوں پی این ایس ٹیپو سلطان اور پی این ایس شاہجہان بحری بیڑے میں شامل ہوگئے۔تفصیلات کے مطابق پاک بحریہ کے ترجمان کی جانب سے بیان میں کہا گیا ہے کہ چین کے تعاون سےتیارکردہ مزید دو 054 ایلفا فریگیٹس کی بحری بیڑے میں شمولیت کی تقریب کا انعقاد کیا گیا۔
ترجمان پاک بحریہ کا کہنا تھا کہ وزیردفاع خواجہ محمد آصف تقریب کےمہمان خصوصی تھے، پاکستان نیوی ڈاکیارڈآمدپرنیول چیف ایڈمرل امجدخان نیازی نےوزیردفاع کااستقبال کیا، تقریب میں سول و ملٹری افسران اور چینی شپ یارڈ کے نمائندوں نے شرکت کی۔تقریب میں پی این ایس شاہجہاں اورپی این ایس ٹیپوسلطان کی بحری بیڑے میں شامل ہوگئے، پی این ایس شاہجہاں اور پی این ایس ٹیپوسلطان جدید ہتھیاروں اور سینسرز سےلیس کثیر المقاصد جہاز ہیں،
مہمان خصوصی نےپی این ایس شاہجہاں اورپی این ایس ٹیپوسلطان کی کمانڈسکرولز کمانڈر پاکستان فلیٹ کےحوالے کیں۔ترجمان نے کہا کہ وزیر دفاع نےخطے میں بحری امن و استحکام کے حوالے سےپاک بحریہ کی کاوشوں کی تعریف کرتے ہوئے جہازوں کی بروقت تکمیل پر ہڈونگ ژونگوا شپ یارڈ چائنہ کی پیشہ وارانہ صلاحیتوں کو سراہا۔نیول چیف نے کہا کہ دونوں جہازوں کی شمولیت سے ملکی سمندری حدود اور مفادات کا دفاع مزید مضبوط ہوگا۔