لاہور (مانیٹرنگ ڈیسک) وزیراعظم شہباز شریف اور آصف زرداری کے درمیان ملاقات ہوئی ہے جس میں آئندہ نگران وزیر اعظم بیوروکریٹ کے بجائے سیاست دان کو لانے پر بھی غور کیا گیا۔ وزیراعظم شہباز شریف اور سابق صدر آصف علی زرداری کے درمیان لاہور میں ملاقات ہوئی جس میں عام انتخابات، نگران سیٹ اپ سمیت آئندہ کی سیاسی حکمت عملی پر تفصیلی گفتگو کی گئی۔ ذرائع کے مطابق آصف علی زرداری اور شہباز شریف کی موجودہ اسمبلی کی مدت کے خاتمے کی حتمی تاریخ پر تفصیلی مشاورت ہوئی، آصف علی زرداری نے موجودہ اسمبلیوں کی مدت اگست کے دوسرے ہفتہ میں ختم کرنے کی تجویز دی جس پر وزیراعظم نے دیگر اتحادیوں کو بھی اعتماد میں لینے کی یقین دہانی کروائی۔ سابق صدر آصف علی زرداری نے وزیراعظم کے آئی ایم ایف سے امدادی پیکج کیلئے کلیدی کردار کو سراہا اور انہیں آئی ایم ایف ڈیل پر مبارکباد دی، اس پر وزیراعظم شہباز شریف نے آصف علی زرداری کا شکریہ ادا کیا۔ سابق صدر نے کہا کہ تحریک انصاف کی حکومت معیشت کیلئے جو بارودی سرنگیں بچھا کر گئی اسے مل کر صاف کر رہے ہیں۔ وزیراعظم نے کہا کہ ہماری ساری توجہ معیشت کی مضبوطی پر ہے اور اللہ کی مہربانی سے کامیابیاں مل رہی ہیں، ملک سے انتشار اور فتنے کی سیاست کا جڑ سے خاتمہ کرکے سیاسی استحکام کی جانب بڑھ رہے ہیں، ملک کو ڈیفالٹ کرنے والوں کا خواب خواب ہی رہ گیا۔
