پاکستان ترکیہ کے عوام اور حکومت کےساتھ ہے، وزیراعظم

اسلام آباد (نمائندہ خصوصی )وزیراعظم محمد شہباز شریف نے کہاہے کہ پاکستان جمہوریت کی ساتویں سالگرہ اور قومی اتحاد کے دن کی یاد میں ترکیہ کے برادر عوام اور حکومت کےساتھ ہے۔ہفتہ کوترکیہ میں جمہوریت کی ساتویں سالگرہ اور قومی اتحاد کے دن کے موقع پروزیراعظم نے اپنے ایک ٹوئٹ میں کہا کہ آج کے دن بہادر ترک عوام کی عظیم قربانیوں کو یاد کرتے ہوئے ہم ان شہدا کو خراج عقیدت پیش کرتے ہیں جنہوں نے جمہوریت اور بنیادی حقوق سے محروم کرنے کی گھناﺅنی کوشش کا بہادری سے مقابلہ کیا۔ وزیراعظم نے کہاکہ 2016کا یہ تاریخی عہد ساز دن میرے بھائی رجب طیب ایردوا ن کی فعال ومتحرک قیادت پر غیرمتزلزل یقین اور گہرے اعتماد کی بھی عکاسی کررہاہے ۔وزیراعظم نے کہاکہ اس دن کا اہم نکتہ یہ ہے کہ اقوام اتحاد، بھائی چارے اور گہرے رشتوں کی طاقت سے کسی بھی چیلنج پر قابو پا سکتی ہیں۔