لاہور( نمائندہ خصوصی ) پاکستان مسلم لیگ (ن) نے آئندہ عام انتخابات کی تیاریوں کے لئے متحرک ہونے کا فیصلہ کر لیا ۔ مسلم لیگ (ن) پنجاب کے صدر رانا ثنا اللہ نے تنظیمی عہدیداروں کا اجلاس 14مئی کو پارٹی کے مرکزی سیکرٹریٹ ماڈل ٹاﺅن میں طلب کر لیا۔ بتایا گیاہے کہ پنجاب بھر سے تنظیمی عہدیداروں جن میں ڈویژنل صدور اور جنرل سیکرٹریز سمیت دیگر شامل ہیں کو اجلاس میں شرکت کے احکامات جاری کر دئیے گئے ہیں۔صدر پنجاب رانا ثنا اللہ تنظیمی عہدیداروں کی مشاورت سے انتخابات کے لیے مضبوط امیدواروں کے چنا ﺅپر مشاورت کریں گے۔ذرائع کے مطابق اجلاس میں پنجاب کے تمام اضلاع میں جلسوں کی تیاریوں کے حوالے سے بھی تبادلہ خیال کیا جائے گا۔ ذرائع کے مطابق اجلاس میں مسلم لیگ (ن)کے قائد میاں نواز شریف کی وطن واپسی پر استقبال کی تیاریوں پر بھی گفتگو کی جائے گی۔پنجاب کے صدر رانا ثنا اللہ پارٹی کی انتخابی مہم کے حوالے سے تمام عہدیداروں کو ذمہ داریاں تفویض کریں گے۔
