گھوٹکی: تحریک استقلال مرکزی صدر رحمت خان وردگ کی سردار علی گوہر خان مہر سے ان کی رہائش گاہ پر ملاقات

گھوٹکی( بیورو رپورٹ ) تحریک استقلال کے مرکزی صدر رحمت خان وردگ نے سردار علی گوہر خان مہر سے ان کی رہائش گاہ پر ملاقات کی اور دونوں رہنماؤں نے ملک کی موجودہ صورتحال پر تشویش کا اظہار کیا اور مہنگائی۔ بے روزگاری اور معاشی بدحالی کا سیاستدانوں کو ذمہ دار قرار دیا۔رحمت خان وردگ اور سردار علی گوہر خان مہر نے اس بات پر اتفاق کا اظہار کیا کہ جب تک سیاسی استحکام نہیں آئے گا اس وقت تک ملک معاشی طور پر مستحکم نہیں ہوسکتا۔ انہوں نے کہا کہ سیاستدان ہوش کے ناخن لیں اور ہٹ دھرمی۔ ضد اور انا کو پس پشت ڈال کر ملکی استحکام اور جمہوریت کی مضبوطی کے لئے مل بیٹھ کر اتفاق رائے سے آئندہ عام انتخابات کے بروقت اور منصفانہ انعقاد کے لئے اتفاق رائے پیدا کریں۔ دونوں رہنماؤں نے اس خواہش کا اظہار کیا کہ سیاستدان مل بیٹھ کر تمام تنازعات کا حل نکالیں گے اور ملک کو سیاسی و معاشی استحکام حاصل ہوگا۔