بھلوال: مسافر وین میں آتشزدگی، 7افراد جاں بحق، 10 زخمی

سرگودھا (نمائندہ خصوصی ) پنجاب کے شہر سرگودھا میں سڑک پر وین میں سلنڈر پھٹنے سے 7 افراد جھلس کر جاں بحق جبکہ 10 افراد زخمی ہو گئے۔ تفصیلات کے مطابق گزشتہ روز سرگودھا میں بھلوال کوٹ مومن روڈ پر ایک چلتی وین میں سلنڈر پھٹ گیا، جس کے باعث سات مسافر جھلس کر جاں بحق ہو گئے ہیں۔ریسکیو ذرائع کا کہنا ہے کہ وین حادثے میں جھلس کر متعدد افراد زخمی بھی ہو گئے ہیں، جنھیں طبی امداد کے لیے تحصیل ہیڈکوارٹر اسپتال منتقل کر دیا گیا ہے۔ریسکیو ذرائع کے مطابق مسافر وین میں سلنڈر سے گیس لیکج کے باعث اچانک آگ بھڑک اٹھی تھی۔مسافر وین میں اچانک آتشزدگی کے بعد لاشوں اور زخمیوں کو اسپتال منتقل کیا گیا۔وین کو جلتا دیکھ کر قریبی آبادی کے لوگ فوری طور پر جمع ہوگئے اور امدادی سرگرمیوں میں حصہ لیا۔پولیس اور امدادی ٹیمیں بھی موقع پر پہنچیں، لاشوں اور زخمیوں کو اٹھایا گیا۔