اسلام آباد (نمائندہ خصوصی ) وزیراعظم محمد شہباز شریف اور ترکیہ کے صدر رجب طیب اردوان کے درمیان ٹیلیفون پر رابطہ ہوا۔ دونوں رہنماﺅں نے ایک دوسرے کو عیدالاضحی کی مبارکباد پیش کی۔ وزیراعظم آفس کے میڈیا ونگ سے جاری بیان کے مطابق وزیراعظم نے عیدالاضحی کے پرمسرت موقع پر ترکیہ کی حکومت اور عوام کو مبارکباد پیش کی۔ صدر اردوان نے وزیراعظم محمد شہباز شریف اور پاکستان کے عوام کو عید کی مبارکباد دی۔ دونوں رہنماﺅں نے پاکستان اور ترکیہ کے درمیان دوطرفہ تعلقات کا بھی جائزہ لیا۔ انہوں نے اس بات پر اتفاق کیا کہ اسلام آباد میں منعقد ہونے وا لا اعلی سطحی سٹریٹجک تعاون کونسل کا ساتواں اجلاس قیادت کو دونوں ممالک کے درمیان قریبی برادرانہ تعلقات بالخصوص اقتصادی شعبہ میں مزید مضبوط بنانے کے لیے آگے بڑھنے کا موقع فراہم کرے گا۔پاکستان اور ترکیہ کے تعلقات مذہب، ثقافت اور تاریخی رشتوں پر استوار ہیں۔ قیادت کی سطح پر باقاعدگی سے رابطہ اس اسٹریٹجک شراکت داری کی نمایاں خصوصیت ہے۔
