اسلام آباد(نمائندہ خصوصی )وزیراعظم محمد شہبازشریف نے ایران اور آذربائیجان کے صدور کو ٹیلی فون کر کے عید الاضحی کی مبارکباد دی ۔ وزیراعظم آفس کے میڈیا ونگ سے جاری بیان کے مطابق وزیراعظم شہبازشریف نے ایران کے صدر سید ابراہیم رئیسی کو عید الاضحی کی مبارکباد دی ۔ وزیراعظم نے ایران کی قیادت اور عوام کے لئے نیک تمناﺅں کا اظہار کیا ۔ ایران کے صدر سید ابراہیم رئیسی نے پاکستان کی قیادت اور عوام کو عید کی جوابی مبارکباد دی اور خیرسگالی کے جذبات کا اظہار کیا۔ دونوں قائدین نے برادر ہمسایہ ممالک کے درمیان دوطرفہ تعاون کو مزید فروغ دینے کے عزم کا اعادہ کیا۔ دونوں رہنماﺅں نے سرحد پر مارکیٹس کے قیام کو دوطرفہ معاشی وتجارتی تعاون کے فروغ کی جانب اہم قدم قرار دیا۔ ایران کے صدر نے ٹیلی فون کرنے اور عید کی مبارکباد پر وزیراعظم شہبازشریف کا شکریہ ادا کیا ۔ وزیراعظم شہباز شریف نے آذربائیجان کے صدر الہام علیوف کو بھی ٹیلی فون کیا اور عید کی مبارکباد کا تبادلہ کیا ۔ وزیراعظم نے آذربائیجان کے عوام اور حکومت کے لئے نیک تمناﺅں کا پیغام دیا ۔ صدر الہام علیوف نے بھی خیرسگالی کے گرمجوش جوابی جذبات کا اظہار کیا ۔ وزیراعظم نے اپنے دورہ آذربائیجان کا حوالہ دیتے ہوئے دوطرفہ تعاون کے عمل کو تیز بنانے کا عزم ظاہرکیا ۔ وزیراعظم نے آذربائیجان سے ایل این جی کی فراہمی کا عمل تیز بنانے کی امید کا بھی اظہار کیا ۔ صدر الہام علیوف نے ٹیلی فون کرنے اور عید کی مبارکباد دینے پر وزیراعظم شہبازشریف کا شکریہ ادا کیا۔
