کراچی (نمائندہ خصوصی )محکمہ موسمیات نے کہا ہے کہ پری مون سون کی ہوائیں سندھ میں داخل ہو رہی ہیں، سندھ کے مختلف مقامات پر30 جون تک گرج چمک کے ساتھ بارش کا امکان ہے۔محکمہ موسمیات کے مطابق عید کے پہلے روز صبح اور رات میں بوندا باندی کا امکان ہے جبکہ عید کے دوسرے روز کہیں کہیں معتدل بارش ہو سکتی ہے۔ محکمہ موسمیات نے بتایا ہے کہ کراچی میں معتدل بارش ہو سکتی ہے جبکہ سندھ کے مختلف مقامات پر کہیں کہیں موسلا دھار بارش بھی ہوسکتی ہے۔محکمہ موسمیات کا یہ بھی کہنا ہے کہ 29 اور 30 جون کے دوران موسم گرم اور مرطوب رہے گا۔پری مون سون بارشوں کا سلسلہ سندھ تک پھیل گیا، سکھر، جیکب آباد، میرپورخاص، بدین، گولاڑچی اور ٹنڈوباگو میں تیز ہوا کے ساتھ بارش ہوئی۔ملیر سمیت کراچی کے بعض علاقوں میں بھی ہلکی بارش کے بعد موسم خوشگوار ہوگیا۔
