کراچی(نمائندہ خصوصی) کراچی میں پاک بحریہ کے افسران اور جوانوں کو عسکری اعزازات تفویض کرنے کی تقریب منعقد ہوئی۔ سربراہ پاک بحریہ ایڈمرل محمد امجد خان نیازی تقریب کے مہمان خصوصی تھے۔ستارہ امتیاز (ملٹری) حاصل کرنے والوں میں کموڈور شہزاد اقبال، کموڈور توقیر احمد خواجہ، کموڈور محمد احسن رضا ملہی اورکموڈور سید طلعت حسین شامل تھے۔ تمغہ امتیاز (ملٹری) حاصل کرنے والوں میں کمانڈر کبیر یحییٰ خان، کمانڈر محمد عاطف خان،لیفٹیننٹ کمانڈر عبدالرحمن خان شامل ہیں۔کمانڈر سید یوسف وقار کو تمغہ بسالت اور برکت علی LCDT کو امتیازی سند سے نوازا گیا۔علاوہ ازیں تمغہ خدمت (ملٹری) کلاس-I کے 14 ایوارڈز، تمغہ خدمت (ملٹری)کلاس-II کے 17 ایوارڈز اور تمغہ خدمت (ملٹری)کلاس-III کے 10 ایوارڈز پاک بحریہ کے چیف پیٹی آفیسرز اور سیلرز کو دیئے گئے جبکہ چیف آف دی نیول اسٹاف کی جانب سے 29 افسران، چیف پیٹی آفیسرز/ سیلرز اور نیوی سویلینز کو ستائشی خطوط سے نوازا گیا۔تقریب میں پاک بحریہ کے حاضر سروس اور ریٹائرڈ افسران کی بڑی تعدادنے شرکت کی۔
