سکھر(نمائندہ خصوصی) سندھ کے شہر سکھر میں مختلف پولیس مقابلوں میں ڈاکو پنہل جاگیرانی سمیت 4ڈاکو ہلاک ہو گئے۔تفصیلات کے مطابق سکھر میں روہڑی تھانے کی حدود میں پولیس مقابلے میں سنگین جرائم میں مطلوب ڈاکو پنہل جاگیرانی ہلاک ہو گیا، پنوں عاقل کے قریب مبینہ پولیس مقابلے میں 3 ڈاکو ہلاک ہوئے۔پولیس حکام کے مطابق روہڑی تھانے والے واقعے میں 5 ملزمان ڈکیتی کے لیے قومی شاہراہ پر موجود تھے، گشت پر مامور پولیس پارٹی کو دیکھ کر ڈاکوﺅں نے فائرنگ کر دی۔پولیس حکام کے مطابق جوابی فائرنگ میں سنگین جرائم میں مطلوب ڈاکو پنہل جاگیرانی ہلاک ہو گیا، جب کہ اس کے 4 ساتھی موقع سے فرار ہو گئے، فرار ڈاکوں کی گرفتاری کے لیے علاقے میں سرچ آپریشن کیا جا رہا ہے۔دوسری طرف سکھر میں پنو عاقل کے قریب مبینہ پولیس مقابلے میں تین ڈاکو ہلاک ہوئے، ہلاک ڈاکوں کی شناخت غلام محمد عرف ننھو میرانی، عمران بلو اور پھلپوٹو کے نام سے ہوئی ہے۔ ان میں ایک ڈاکو مقابلے میں زخمی ہو گیا تھا جو اسپتال منتقلی کے دوران ہلاک ہوا۔
