کراچی(نمائندہ خصوصی)نو منتخب میئرکراچی مرتضی وہاب اور ڈپٹی میئرسلمان مراد آج(پیر)اپنے عہدے کا حلف اٹھائیں گے۔تفصیلات کے مطابق پیپلز پارٹی سے تعلق رکھنے والے مرتضی وہاب بحیثیت میئر کراچی اور سلمان مراد بطور ان کے نائب آج(پیر) حلف لیں گے۔میئر اور ڈپٹی میئر کی تقریب حلف برداری کراچی میں گلشنِ جناح پولو گراﺅنڈ میں منعقد ہو گی۔الیکشن کمیشن حکام کے مطابق الیکشن کمشنر سندھ اعجاز چوہان میئر اور ڈپٹی میئر سے حلف لیں گے۔حکام کے مطابق پیرکو سندھ بھر میں ہیڈ آف کونسلز کی حلف برداری ہو گی، جس سے سندھ میں بلدیاتی الیکشن کا عمل مکمل ہو جائے گا۔واضح رہے کہ پیپلز پارٹی کے مرتضی وہاب اور سلمان مراد 15 جون کو میئر اور ڈپٹی میئر منتخب ہوئے تھے۔
