بیجنگ(این این آئی)چین، پاکستان اور ایران نے علاقائی سلامتی کے معاملات پر پہلے سہ فریقی اجلاس کے بعد انسداد دہشت گردی کے باقاعدہ مذاکرات پر اتفاق کیا ہے۔غیرملکی خبررساں ادارے کے مطابق چینی وزارت کے بیان میں کہاگیاکہ، چینی وزارت خارجہ کے بیرونی سلامتی امور کے ڈائریکٹر، بائی تیان نے بیجنگ میں پاکستانی اور ایرانی ہم منصبوں سے ملاقات کی جس میں علاقائی انسداد دہشت گردی کی کوششوں کا جائزہ لیا اور دہشت گردوں کی سرحد پار نقل و حرکت سے نمٹنے کے لیے مشترکہ کارروائی پر تبادلہ خیال کیا۔بائی نے پاکستانی وزارت خارجہ کے ڈائریکٹر جنرل عبدالحمید کے ساتھ ساتھ سید رسول موسوی، معاون وزیر خارجہ اور ایرانی وزارت خارجہ میں جنوبی ایشیا کے ڈائریکٹر جنرل سے بھی الگ الگ ملاقاتیں کیں۔ اس دوران چین کے معاون وزیر خارجہ نونگ رونگ نے بھی حمید اور موسوی سے الگ ملاقات کی۔ چین کی وزارت خارجہ کے ترجمان وانگ وین بِن نے فروری میں تجویز کردہ چین کے گلوبل سیکیورٹی انیشیٹو کے حصے کے طور پر مشاورت کے طریقہ کار کو بیان کرتے ہوئے کہا تھا کہ تینوں فریقوں نے سہ فریقی انسداد دہشت گردی سیکیورٹی مشاورت کو ادارہ جاتی بنانے کا فیصلہ کیا۔وانگ نے پریس بریفنگ میں کہا کہ چین ہر قسم کی دہشت گردی کی سختی سے مخالفت اور مذمت کرتا ہے، اور تینوں ممالک کے مفادات اور علاقائی سلامتی کے لیے خطرہ بننے والی دہشت گرد قوتوں کے خلاف کریک ڈاون کے لیے قریبی تعاون کے لیے پاکستان اور ایران کے ساتھ کھڑے ہونے کو تیار ہے۔ چینی ماہرین کے مطابق تین طرفہ مذاکرات کی بہت زیادہ اہمیت ہے اور اس کی توجہ زیادہ تر افغانستان میں عسکریت پسندی کے پھیلنے والے اثرات کو روکنے پر مرکوز ہوگی۔بیلٹ اور روڈ کے بنیادی ڈھانچے کی تعمیر کو درپیش دہشت گردی کے خطرات بھی بحث کا موضوع ہوں گے۔چینی میڈیا کے مطابق دو سال قبل طالبان کی جانب سے کابل میں امریکی حمایت یافتہ حکومت کا تختہ الٹنے کے بعد سے پاکستان کو دہشت گردانہ حملوں کا سامنا ہے۔ آنے والے ہنگاموں نے چین مخالف باغی گروپ تحریک طالبان پاکستان کو بڑھنے کی گنجائش فراہم کر دی ہے۔ عسکریت پسند گروپ اسلامک اسٹیٹ، جو طالبان کا ایک اہم حریف ہے، بھی طالبان کے قبضے کے بعد سے خطے میں زیادہ سرگرم ہو گیا ہے۔چین کی نارتھ ویسٹ یونیورسٹی کے پروفیسر یان وی نے کہا کہ طالبان نے اقتدار سنبھالنے کے بعد ایران سمیت وسطی جنوبی ایشیا میں انتہا پسندی کو دوبارہ فعال کرنے کا سبب بنا ہے، کیونکہ ایک نیا نظام تشکیل پا رہا ہے جب اصل حکومت کی جگہ ایک نئی حکومت آتی ہے۔ ان قریبی ممالک کی سلامتی کا یقینا ہم پر اثر پڑے گا، خاص طور پر چونکہ ہم پاکستان کے پڑوسی ہیں جبکہ ایران ہمارا دور کا پڑوسی ہے،چین حالیہ برسوں میں ایران اور پاکستان دونوں کے ساتھ قریبی تعلقات استوار کر رہا ہے، جس میں ایران کے ساتھ 25 سالہ تعاون کے معاہدے پر دستخط کرنا اور بیلٹ اینڈ روڈ حکمت عملی کے تحت چین پاکستان اقتصادی راہداری کا قیام شامل ہے۔
