سبی/ راولپنڈی(نمائندہ خصوصی )سبی کے علاقے نوشمان میں دہشتگردوں کی موجودگی اطلاع پر آپریشن، بے گناہ شہریوں کو نشانہ بنانے اور کوئلے کی کان کے مالکان کو ہراساں کرنے میں ملوث دہشت گردوں کیساتھ فائرنگ کا تبادلہ، 1 دہشت گرد مارا گیا، 2 زخمی، ہتھیار برآمد کرلےئے گئے ۔آئی ایس پی آر کے مطابق بلوچستان میں سبی کے جنوبی علاقے نوشمان میں دہشت گردوں کے ایک گروپ کے خلاف انٹیلی جنس پر مبنی آپریشن کیا گیا، یہ دہشت گرد علاقے میں شہریوں کو نشانہ بنانے کے علاوہ کوئلہ کان کے مالکان کو ہراساں کرنے میں ملوث تھے، مصدقہ اطلاعات کی بنیاد پر گزشتہ دو دنوں سے دہشت گردوں کے علاقے میں مختلف راستوں پر متعدد گھات لگا کر تین دہشت گردوں کی ٹولی کو روکا گیا، روکے جانے پر انہوں نے سیکورٹی فورسز پر فائرنگ کردی، شدید فائرنگ کے تبادلے کے دوران ایک دہشت گرد مارا گیا جبکہ دو زخمی ہوئے، اسلحہ اور گولہ بارود کا ذخیرہ بھی برآمد کر لیا گیا، ترجمان کے مطابق پاک فوج قوم کے شانہ بشانہ بلوچستان کے امن، استحکام اور ترقی کو سبوتاژکرنے کی تمام سازشوں کو ناکام بنانے کے لئے پرعزم ہے۔
