کراچی (نمائندہ خصوصی ) حکومتی اعلان کے باوجود کراچی کے مختلف علاقوں میں سحری اور افطاری کے وقت اچانک گیس غائب ہوگئی ، جس سے خواتین کو سحری اور افطاری کی تیاری میں مشکلات کاسامنا کرنا پڑا، اطلاعات کے مطابق ساون گیس فیلڈ میں فنی خرابی کے باعث 45ایم ایم سی ایف سی گیس کی کمی واقع ہوگئی ہے۔تفصیلات کے مطابق کراچی میں سحری میں گیس بحران جاری ہے، مختلف علاقوں میں پریشرکم رہا اور گیس اچانک غائب ہوگئی۔گیس کی لوڈشیڈنگ کے باعث گھروں میں خواتین کو سحری کی تیاری میں مشکلات کا سامنا کرنا پڑا۔لانڈھی، کورنگی، خواجہ اجمیر نگری،نارتھ کراچی سیکٹرالیون سی ٹو میں گیس نہیں آئی جبکہ نارتھ ناظم آباد ، اورنگی ، بلدیہ،قائم خانی کالونی،لیاقت آباد میں گیس کی لوڈشیڈنگ جاری رہی۔اس کے علاوہ ہجرت کالونی ، گارڈن ، ڈیفنس، صدر، گڈاپ ، کاٹھور، اسکیم تینتیس میں بھی گیس نہ آئی، جس سے شہری اذیت میں مبتلا ہے۔دوسری جانب جہانگیرروڈ پر شہریوں نے گیس لوڈشیڈنگ کےخلاف احتجاج کرتے ہوئے ٹائر نذر آتش کرکے روڈ بلاک کردیا۔گذشتہ روز کراچی شہرکا بڑاحصہ کم پریشر اور گیس سے اچانک محروم ہوگیا تھا، اطلاعات کے مطابق ساون گیس فیلڈ میں فنی خرابی کے باعث 45ایم ایم سی ایف سی گیس کی کمی واقع ہوگئی ہے۔ذرائع نے بتایاکہ سوئی سدرن گیس کمپنی(ایس ایس جی سی)کو مجموعی طورپر300 ایم ایم سی ایف ڈی سےزائد کمی کا سامنا ہے۔
کراچی کے مختلف علاقوں میں سحری اور افطاری کے وقت گیس غائب
ساون گیس فیلڈ میں فنی خرابی کے باعث 45ایم ایم سی ایف سی گیس کی کمی واقع ہوگئی،ذرائع
