کراچی(ہیلتھ رپورٹر )
پاکستان میں برطانوی ڈپٹی ہائی کمشنر مائیک نیتھاوریا ناکیس (Mr Mike Nithavarianakis)نے گزشتہ پانچ دہائیوں کے دوران آبادی کی بڑی تعداد کو طب کی غیر معمولی مفت سہولیات کی فراہمی پر زبردست خراج تحسین پیش کیا۔ ان خیالات کا اظہار انہوں نے ایس آئی یو ٹی میں اپنے خطاب میں کیا۔ ایس آئی یوٹی کے دورے پر آنے والے برطانوی سفیر نے کہا کہ پاکستان اور برطانیہ کے درمیان طبی تعلیم اور صحت کی دیکھ بھال کے شعبے میں تعاون اور تعلقات نہ صرف پرانے ہیں بلکہ بے حد مضبوط ہیں۔ انہوں نے یاد دلایا کہ برطانیہ کے نیشنل ہیلتھ سروسز (این ایچ ایس ) میں خدمات انجام دینے والے طبی ماہرین کی ایک بڑی تعداد کا تعلق پاکستان سے ہے۔ انہوں نے خاص طور پر اس بات کا تذکرہ کیا کہ ان کے ملک میں گراں قدر خدمات انجام دینے والے ڈاکٹروں کی ایک بڑی تعداد ڈاؤ میڈیکل کالج کراچی کے فارغ التحصیل ہیں
برطانوی سفارتکارنے نرسنگ کے شعبے کو مضبوط بنانے کی ضرورت پر زور دیا کیونکہ یہ شعبہ صحت کی فراہمی کے نظام میں اہم کردار ادا کرتی ہیں۔ دونوں ممالک کے درمیان پیشہ ورانہ ترقی کی راہیں تلاش کرنے کی ضرورت پر زور دیتے ہوئے انہوں نے کہا کہ باہمی تعاون سے اس شعبہ کو مزید ترقی دی جاسکتی ہے۔ انہوں نے ڈاکٹر ادیب رضوی ڈائریکٹر ایس آئی یو ٹی اور ان کی ٹیم کو بلا امتیاز اور بلا امتیاز مفت طبی امداد فراہم کرنے کے فلسفے پر معاشرے کے لیے نمایاں خدمات انجام دینے پر خراج تحسین پیش کیا۔قبل ازیں ڈاکٹر ادیب رضوی نے معزز مہمان کا خیرمقدم کیا اور بتایا کہ برطانیہ میں اپنی پوسٹ گریجویٹ تعلیم کے دوران این ایچ ایس میں اسکیم کا تجربہ کرنے کے بعد انہوں نے "سب کے لیے مفت طبی دیکھ بھال” کا فلسفہ اپنایا۔ انہوں نے گزشتہ پچاس سالوں میں ایس آئی یو ٹی کی تاریخ اور سفر سے بھی آگاہ کیا۔اس موقع پر ڈاکٹر نقی ظفر نے بھی خطاب کیا اور اسپتال کی سرگرمیوں کے نمایاں خدوخال اور پچھلے پچاس سالوں کے دوران حاصل کی گئی نمایاں کامیابیوں کے بارے میں بتایا۔برطانوی سفارت کار نے ہسپتال کے مختلف شعبوں کا معائنہ کیا۔
